რეგიონული განვითარების და ინფრასტურქტურის მინისტრი და ვიცე-პრემიერი მაია ცქიტიშვილი ირაკლი ღარიბაშვილის მთავრობაში აღარ იქნება. ამ თანამდებობას მისი პირველი მოადგილე ირაკლი ქარსელაძე დაიკავებს.

"მე მინდა, ქალბატონ მაია ცქიტიშვილს გულწრფელი მადლობა გადავუხადო მისი ერთგული სამსახურისთვის ჩვენი ქვეყნისადმი, მისი გაწეული არაჩვეულებრივი საქმიანობისთვის, რომელიც 9 წლის განმავლობაში ემსახურებოდა ჩვენს ქვეყანას და არაერთ მთავრობას, უკვე 5 პრემიერმინისტრის მთავრობას და მე მინდა გუნდის სახელით და პირადად ჩემგან გულწრფელი მადლობა გადავუხადო", — განაცხადა პრემიერმინისტრობის კანდიდატმა, ირაკლი ღარიბაშვილმა ქართული ოცნების ოფისში გამართულ პრესკონფერენციაზე.

ცქიტიშვილის თქმით, "ბოროტად ისარგებლა" იმით, რომ 15 წელზე მეტია იცნობს ღარიბაშვილს და სთხოვა, რომ მისცეს საშუალება დაუბრუნდეს ოჯახს და წავიდეს აქტიური პოლიტიკიდან.

"გულწრფელად ვთხოვე, რომ მომცეს საშუალება მე დავუბრუნდე ჩემს ოჯახს, გამოვიდე აქტიური პოლიტიკური ცხოვრებიდან და შესაბამისად, ის 9 წლიანი პერიოდი ჩემი ცხოვრების, ძალიან დატვირთული და საინტერესო დავასრულო ამით და მივცე საშუალება ჩემს გუნდს... ბატონი ირაკლი ქარსელაძე უკვე როგორც ითქვა არის ჩემი პირველი მოადგილე 3 წლის განმავლობაში", — თქვა ცქიტიშვილმა.

ცქიტიშვილმა მადლობა გადაუხადა ქართული ოცნების დამფუძნებელს, ბიძინა ივანიშვილს და გუნდს და აღნიშნა, რომ მათ გულშემატკივრად რჩება.

"პოლიტიკაში მისი მოსვლის პირველივე დღიდან ასევე, მოგეხსენებათ პოლიტიკაში ვიყავი. მთელი ამ პერიოდის განმავლობაში მე ვიზიარებდი სრულად ქართული ოცნების ფასეულობებს, სულისკვეთებას და მე ვრჩები ამ ფასეულობების ერთგული და ბუნებრივია, ყოველთვის ვიქნები ქართული ოცნების მხარდამჭერი და გულშემატკივარი იმ ხალხის, რომელიც ასე გულწრფელად და კარგად აკეთებს თავის საქმეს".

ცქიტიშვილმა ჟურნალისტების კითხვებს არ უპასუხა და თქვა: "ვისარგებლებ შემთხვევით, რომ როგორც აქტიური პოლიტიკიდან წასული ადამიანი, აღარ ვიყო თქვენი რესპონდენტი".

მაია ცქიტიშვილი რეგიონული განვითარებისა და ინფრასტრუქტურის სამინისტროს 2018 წლის აპრილიდან ხელმძღვანელობდა.

ცქიტიშვილის გარდა, სამთვრობო გუნდში კიდევ ერთი ცვლილებაა. კერძოდ, თავდაცვის მინისტრი მოქმედი მოადგილე ჯუანშერ ბურჭულაძე იქნება. სხვა მინისტრებს ღარიბაშვილი უცვლელად ტოვებს.