„დანაშაულზე წასწრებულებმა ატეხეს ახალი პიარკამპანია, იმისათვის რომ რაღაცნაირად, ჩვენ, როგორც ხდება ხოლმე, გადმოგვაბრალონ ეს ამბავი,“ - განაცხადა ქართული ოცნების წევრმა, მამუკა მდინარაძემ ტელეკომპანია რუსთავი 2-ის ეთერში. მან ამის შესახებ რუსთავი 2-ის საქმის განმხილველი მოსამართლეების მიმართ შესაძლო ზეწოლის ფაქტზე შეფასებისას ისაუბრა.

მდინარაძის თქმით, მცდეობაა ბოლო დროის განმავლობაში მნიშვნელოვანი მოვლენა - ვიზალიბერალიზაცია გადაიფაროს. მდინარაძის განმარტებით, ჯერ ჩანაწერების ავთენტურობა უნდა დადასტურდეს და შემდეგ დაიწყოს მის შესახებ საუბარი.

„ყველა ნიუსი გაიარეს მათ, გვაჩვენეს მოდელირება - როგორ ყალბდება, გასაგებია, რომ ამის გამოცდილება არსებობს, მოგვიყვნენ როგორ იდგმება ასეთი სპექტაკლები. თუმცა, ის ამბავი, რომელიც გუშინ გახდა ცნობილი, რომ მოსამართლეს [მამუკა ახვლედიანი], რომელსაც ნიკა გვარამია ესაუბრებოდა და მილიონებზე იყო საუბარი, მართლაც, დაუდასტურდა მილიონიანი ქონების, თუ აქტივის შეძენა. ამაზე არცერთი მათგანი [ნიკა გვარამია, გიგი უგულავა, ნინო კალანდაძე] არ საუბრობს,“ - აღნიშნა მამუკა მდინარაძემ.

უზენაესი სასამართლოს ორი მოსამართლე პროკურატურას მათზე შესაძლო ზეწოლის ფაქტების გამოძიებას სთხოვს.