უზენაესი სასამართლოს ორი მოსამართლე პროკურატურას მათზე შესაძლო ზეწოლის ფაქტების გამოძიებას სთხოვს. მთავარი პროკურატურა On.ge-სთან საუბარში აცხადებს, რომ 2017 წლის 14 იანვარს, უზენაესი სასამართლოს მოსამართლეების, ბესარიონ ალავიძისა და პაატა ქათამაძის განცხადებისა და სასამართლოს მომართვის საფუძველზე დაიწყო გამოძიება.

გამოძიება მიმდინარეობს საქართველოს სისხლის სამართლის კოდექსის 364-ე მუხლის მე-2 ნაწილით გათვალისწინებული დანაშაულის ნიშნებით, რაც გულისხმობს სამართალწარმოების განხორციელებისათვის ან წინასწარი გამოძიებისათვის ხელის შეშლას. პროკურატურის პრესსამსახურის განცხადებით, ჩატარდა არაერთი საგამოძიებო მოქმედება:

"ამ ეტაპისათვის გამოძიების მიერ ჩატარებულია მთელი რიგი საგამოძიებო მოქმედებები და გამოძიება გრძელდება ინტენსიურ რეჟიმში. მიმდინარე გამოძიების ფარგლებში ჩატარდება ყველა აუცილებელი საგამოძიებო მოქმედება უზენაესი სასამართლოს მოსამართლეების საქმიანობაში ჩარევის შესაძლო ფაქტების გადამოწმების მიზნით. გამოძიების შედეგების შესახებ დამატებით ეცნობება საზოგადოებას".

ტელეკომპანია რუსთავი 2-ის ცნობით, მოსამართლეები, პაატა ქათამაძე და ბესარიონ ალავიძე, კოლეგიის ფარგლებში, რუსთავი 2-ის გახმაურებული საქმის განხილვაში მონაწილეობდნენ.

აღნიშნულ თემაზე, ხვალ, 3 თებერვალს, 12 საათზე, რუსთავი 2-ის გენერალური დირექტორი ნიკა გვარამია საგანგებო ბრიფინგს გამართავს.