ამერიკელმა ონკოლოგმა თავის 200 პაციენტს $650 ათასი სესხი გამოუქვითა, რომელიც მათ მკურნალობის ხარჯების დასაფარავად ჰქონდათ აღებული.

ექიმმა ომარ ატიკმა თითქმის 30-წლიანი მუშაობის შემდეგ არკანზასის შტატში მდებარე ონკოლოგიური ცენტრი გასულ წელს დახურა.

იგი მორჩენილი ვალების აღსარიცხავად სესხების შემგროვებელ კომპანიასთან მუშაობდა, როცა მიხვდა, რამდენი ოჯახის ეკონომიკურ მდგომარეობას დააწვა პანდემია მძიმედ.

ამიტომ, საშობაოდ ატიკმა გადაწყვიტა, თავისი პაციენტებისათვის წერილი მიეწერა და ეხარებინა, რომ მათი ვალები გაუქმებული იყო.

"ამ დროის განმავლობაში გავაანალიზე, რომ ზოგიერთ ადამიანს გადახდა საერთოდ არ შეუძლია", — აღნიშნავს ექიმი, — "ამიტომ, მე და ჩემი ცოლი, როგორც ოჯახი, ამაზე დავფიქრდით და შევაფასეთ, რამდენად შეგვეძლო ვალების გამოქვითვა. როცა აღმოჩნდა, რომ ეს თავისუფლად იყო შესაძლებელი, ბევრი აღარ გვიყოყმანია".

ომარ ატიკმა, რომელიც წარმოშობით პაკისტანიდანაა, არკანზასში ონკოლოგიურ დაავადებათა სამკურნალო კლინიკა 1991 წელს დააფუძნა და პაციენტებს ისეთ მომსახურებას სთავაზობდა, როგორიც ქიმიოთერაპია, სხივური თერაპია და აქსიალურ-კომპიუტერული ტომოგრაფიაა. ამჟამად იგი აკრანზასის უნივერსიტეტის მედიცინის მეცნიერებათა პროფესორია.

"ვიფიქრეთ, რომ ამის გასაკეთებლად უფრო შესაფერისი დრო ვერც იქნებოდა — პანდემიამ ადამიანების ცხოვრება, საცხოვრებელი, საქმიანობა და ყველაფერი გაანადგურა", — ამბობს ატიკი.

შობის მისალოც ბარათში ექიმმა დაწერა:

"არკანზასის ონკოლოგიურ დაავადებათა სამკურნალო კლინიკა ძალიან ამაყობს, რომ თქვენნაირ პაციენტებს ემსახურა. მიუხედავად იმისა, რომ მკურნალობის ხარჯების დიდ ნაწილს სადაზღვევო კომპანიები ფარავენ, დარჩენილი თანხა ბევრისთვის მაინც ძნელად გადასახდელია. სამწუხაროდ, ჩვენი ჯანდაცვის სისტემა ამჟამად ასე მუშაობს. ამიტომ, კლინიკამ გადაწყვიტა, რომ პაციენტების ფინანსური ვალდებულებები გამოქვითოს. ბედნიერ დღესასწაულებს გისურვებთ!"

სესხების შემგროვებელი კომპანიის დირექტორის შეფასებით, ატიკი "ძალიან მზრუნველი ადამიანია".

"მასთან, როგორც კლიენტთან, ყოველთვის ადვილი იყო მუშაობა", — ამბობს ბეა ჩიზმენი, — "აღფრთოვანებული ვარ, რომ მან და მისმა ოჯახმა ეს გადაწყვეტილება მიიღეს, რადგან ონკოლოგიურ პაციენტებს, მოსახლეობის უმეტესობისგან განსხვავებით, ბევრად მეტ სირთულესთან უხდებათ გამკლავება".

არკანზასის მედიცინის საზოგადოების საადვოკატო ჯგუფის ხელმძღვანელი, დევიდ როტენი, ამბობს, რომ ექიმი მას პირადად დაუკავშირდა და გადაამოწმა, შესაძლებელი თუ იყო მისი იდეის განხორციელება.

"ექიმ ატიკს რომ იცნობდეთ, უკეთ გაიგებდით", — ამბობს როტენი, — "პირველ რიგში, იგი ერთ-ერთი ყველაზე ჭკვიანი ექიმია, ვისაც კი შევხვედრივარ; თუმცა, ამავდროულად, იგი ყველაზე თანამგრძნობი ექიმიცაა, რომელსაც ვიცნობ".