დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის ინფორმაციით, იმ ადამიანს, ვისაც კორონავირუსის ახალი შტამი დაუდასტურდა, მოგზაურობის ისტორია არ ჰქონია, თუმცა ჰქონდა მის კონტაქტს.

"მას არ აქვს მოგზაურობის ისტორია, მაგრამ მას ჰქონდა კონტაქტი მანამდე, სანამ ავად გახდებოდა, ადამიანთან, ვისაც ჰქონდა მოგზაურობის ისტორია. მოძიებულია იმ ადამიანის ნიმუში, მიმდინარეობს მისი სეკვენირება. ის ადამიანი საქართველოში აღარ არის", — განაცხადა პაატა იმნაძემ საკოორდინაციო საბჭოს სხდომის შემდეგ.

მან ასევე განმარტა, როგორ დაადასტურეს ახალი შტამი. იმნაძის თქმით, შეისწავლეს საქართველოში დადასტურებული კორონავირუსის ყველა შემთხვევა და სამის გარდა, ყველგან PCR-ის სამი გენიდან სამივე იყო დადებითი, ხოლო ამ სამ შემთხვევაში 2 გენი იყო დადებითი და ერთი უარყოფითი, რის გამოც მათი კვლევა გაგრძელდა, ახალი შტამი კი დადასტურდა მხოლოდ ერთ შემთხვევაში.

"როცა გამოქვეყნდა პირველი მონაცემები, რომ ბრიტანეთში გაჩნდა ასეთი შტამი და სამეცნიერო მტკიცებულებები, რა შემთხვევაში შეიძლებოდა ეს ყოფილიყო, ჩვენ ვნახეთ ყველა დადებითი შემთხვევა საქართველოში, რაც კი იყო ყველა ლაბორატორიაში, იმისთვის, რომ მოგვენახა საეჭვო დადებითი შემთხვევები. საეჭვო დადებითი შემთხვევა არის, თუ სამი გენიდან, რომელიც PCR-ში გამოიყენება სამიზნედ, ორი იყო დადებით და ერთი არა. ასეთი იყო ის სამი შემთხვევა რამდენიმე ათასი დადებითი შემთხვევიდან, რაც იყო საქართველოში მთლიანად. ყველა სხვა შემთხვევა, რომელიც იყო საქართველოში დადებითი, იყო სამივე გენზე დადებითი. იყო სამი შემთხვევა, როცა 2 გენი იყო დადებით, ერთი უარყოფითი და ეს სამი გადაირჩა", — თქვა იმნაძემ.

მისივე განმარტებით, ახალ შტამზეც ტესტირება ტარდება როგორც PCR, ისე ანტიგენ ტესტით. რაც შეეხება იმას, მოქმედებს თუ არა ვაქცინა ამ შტამზეც, იმნაძე ამბობს, რომ პასუხი კვლევების შემდეგ ექნება.

საქართველოში კორონავირუსის ახალი, ე.წ. ბრიტანული შტამი 3 იანვარს დადასტურდა. NCDC-ის ცნობით, პაციენტი 50 წელს გადაცილებული კაცია, რომლის მდგომარეობა დამაკმაყოფილებელია და თვითიზოლაციაში იმყოფება. გამოვლენილია ინფიცირებულთან კონტაქტებიც.