პარლამენტმა დაამტკიცა კანონი, რომლის მიხედვითაც ეპიდემიით დაზარალებულ თბილისის მერიის მოიჯარეებს შეღავათებით სარგებლობის საშუალება 1 ივლისამდე ექნებათ.

უფრო კონკრეტულად, ადგილობრივი თვითმმართველობის კოდექსში შეტანილი ცვლილებების მიხედვით, თბილისის მერის მიეცემა შესაძლებლობა მიმართოს საკრებულოს აღნიშნული პირებთან "საინვესტიციო პირობის შეცვლის ან გაუქმების ან/და ფინანსური პირობის შეცვლის შესახებ".

კანონპროექტის განმარტებით ბარათში ვკითხულობთ, რომ ყოველ კონკრეტულ შემთხვევაში მუნიციპალიტეტი საშეღავათო წინადადებას განიხილავს ეპიდემიის მასშტაბიდან გამომდინარე.

რეგიონული პოლიტიკისა და თვითმმართველობის კომიტეტზე დაისვა საკითხი, რომ კანონპროექტში ჩაწერილი ფრაზა, "საინვესტიციო პირობების შეცვლა" შესაძლებელია გაგებული იქნას არა როგორც შეღავათების დაწესება ბიზნესისთვის, არამედ პირიქით, კონტრაქტის პირობების გაუარესება.

არასამთავრობო ორგანიზაცია დემოკრატიის ინდექსის წარმომადგენელი, ქეთევან ციმაკურიძე ითხოვდა კანონპროექტში პირდაპირ ჩაწერილიყო, რომ ცვლილების მიზანი მუნიციპალიტეტის კონტრაქტორებისთვის შეღავათების დაწესებაა.

კანონპროექტის ერთ-ერთმა ავტორის, ბექა დავითულიანის განმარტებით, მოიჯარის თანხმობის გარეშე მუნიციპალიტეტი ვერ შეცვლის კონტრაქტის პირობებს, შესაბამისად, ხელშეკრულების პირობების გაუარესების ალბათობა გამოირიცხება.

"კონტრაქტით გაწერილია ვალდებულებები და ორივე მხარის თანხმობა სჭირდება ამ ვალდებულებების შეცვლას. თუ მუნიციპალიტეტის მხირდან უარესდება მოიჯარის პირობა, უბრალოდ არ დათანმხდება და ვერ შევუცვლით მისი თანხმობის გარეე. ეს მარტივი ლოგიკა გამორიცხავს უბრალოდ გაუარესების შესაძლებლობას", — განაცხადა დავითულიანმა.

ციმაკურიძის თქმით, შესაძლოა მუნიციპალიტეტის კონტრაქტორის ნება დაითრგუნოს სხვადასხვა საშუალებით მუნიციპალიტეტის მხრიდან და იგი იძულებული გახდეს დანახმდეს მისთვის არასასურველ პირობებს.

დავითულიანმა განაცხადა, რომ სამართლებრივად ამის შესაძლებლობა არ არსებობს, არაფორმულურ გარიგებებს კი მუხლის დაზუსტება თავიდან ვერ აგავცილებს.

"თუ ვსაუბრობთ არაფორმალურ ზემოქმედებებზე, რომც ჩავწეროთ კონტრაქტში რომ ასეა, შეიძლება რაღაც ისეთი პირობა ჩაუდონ მერე, რომ ფორმალურად გაფორმდეს, თითქოს შეღავათია და არ აწყობდეს იმ კონტრაქტორს", — განაცხადა დავითულიანმა.

ციმაკურიძის თქმით, იმ შემთხვევაში, თუ კანონში ჩაიწერება, რომ მუნიციპალიტეტსა და მოიჯარეს შორის ხელშეკრულების ცვლილება მხოლოდ ამ უკანასკნელისთვის შეღავათების დაწესების მიზნით უნდა მოხდეს, შემცირდება მასზე არაფორმალური ზემოქმედების რისკები. თუმცა, კანონპროექტის ავტორმა ეს არგუმენტი არ გაითვალისწინა და ჩანაწერის ფორმულირების შეცვლაზე უარი განაცხადა.

"პოლიტიკურ ნებაზე თუ ლაპარაკობთ, უბრალოდ შეუძლებელია მსგავსი რამე მოხდეს", — განაცხადა კომიტეტის თავმჯდომარემ, სოზარ სუბარმა.

მუნიციპალიტეტის მოიჯარეებს შეღავათებით სარგებლობის საშუალება 2021 წლის 1 იანვარს შეუჩერდათ. როგორც კანონპროექტის ინიციატორები განმარტავენ, მისი ექვსი თვით გახანგრძლივების იდეა ეპიდვითარებიდან გამომდინარე გაუჩნდათ.

კანონპროექტის ინიციატორები არიან პარლამენტარები — ბექა დავითულიანი, მაია ბითაძე და ირაკლი ზარქუა. სამივე მათგანი პარლამენტარობამდე თბილისის მერიასა და საკრებულოში მუშაობდა.