საპროცედურო საკითხთა და წესების კომიტეტის წევრის, გიორგი კახიანის თქმით, იმ პარტიებს წარმომადგენლებს, რომელთა საარჩენო სიები ცესკოს მიერ ანულირებულია, ადგილმონაცვლე არ ეყოლებათ. სწორედ ამიტომ, კომიტეტი არ ჩქარობს მათი უფლებამოლისების საკითხის განხილვას.

"ჩვენ, რა თქმა უნდა, სიფრთხილით ვუდგებით უფლებამოსილებების შეწყვეტის საკითხს. ანუ, იმ პარტიებს, რომლებსაც ჩახსნილი აქვთ თავისი სიები, მათი პარლამენტის წევრების უფლებამოსილებების შეწყვეტა გამოიწვევს იმას, რომ მათ ადგილმონაცვლე არ ეყოლებათ, ამიტომ, ვიდრე საბოლოოდ შეთანხმება არ შედგება და ეს მოლაპარაკებების რაუნდი არ დასრულდება, ცხადია, ჩვენ ამ გადაწყვეტილებას ჯერ არ ვიღებ", — განაცხადა გიორგი კახიანმა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.

დღეს, 4 იანვარს, პარლამენტის საპროცედურო საკითხთა და წესების კომიტეტმა განიხილა პატრიოტთა ალიანისის სიის პირველი სამი ნომრის — ირმა ინაშვილის, გიორგი ლომიასა და გოჩა თევდორაძის საპარლამენტო უფლებამოსილების ვადამდე შეწყვეტის საკითხი. საბოლოო გადაწყვეტილება დღის ბოლომდე გახდება ცნობილი.

შეგახსენებთ, რომ პატრიოტთა ალიანსმა საპარლამენტო არჩევნებში 4 მანდატი მოიპოვა. პარტიის საარჩევნო სიის მე-4 ნომერი, ავთანდილ ენუქიძე მანდატის დატოვებაზე უარს ამბობს, ხოლო როდის შევა პარლამენტში, ჯერ არ გადაუწყვეტია.

ოპოზიცია 2020 წლის 31 ოქტომბერს ჩატარებული საპარლამენტო არჩევნების შედეგებს არ აღიარებს. მათ უარი თქვეს არჩევნების მეორე ტურში მონაწილეობასა და საპარლამენტო მანდატებზე. პოლიტიკური კრიზისიდან გამოსასვლელად მმართველ პარტიასა და ოპოზიციას შორის მოლაპარაკებები აშშ-სა და ევროკავშირის ელჩების შუამავლობით მიმდინარეობს. უკვე გაიმართა მოლაპარაკებების ოთხი რაუნდი. მეხუთე რაუნდი, სავარაუდოდ, იანვრის ბოლომდე გაიმართება.

მიუხედავად იმისა, რომ ბარიერგადალახული ოპოზიციური პარტიების დიდმა ნაწილმა ჯერ ცესკოს მიმართა საარჩევნო სიების ანულირების, ხოლო შემდგომ, პარლამენტს თითოეული დეპუტატის მანდატის გაუქმების მოთხოვნით, მმართველ პარტიაში ამბობენ, რომ მოლაპარაკებების დასრულების შემდეგ, პარლამენტი ერთპარტიულად აღარ გააგრძელებს მუშაობას.