სტრატეგია აღმაშენებლის ერთ-ერთი ლიდერის, სერგო ჩიხლაძის განცხადებით, მოლაპარაკებების მეხუთე რაუნდი ხელისუფლებასა და ოპოზიციას შორის იანვრის შუა რიცხვებში გაიმართება.

"მორიგი რაუნდი გაიმართება, დიდი ალბათობით, ამ თვეში. მოლოდინი რეალურად გვაქვს, რომ შედგება მოლაპარაკებები, შედგება შეთანხმება ორმხრივი კონსენსუსის გზით. პირველ რიგში, უნდა მოვიდეს ხელისუფლება თავისი წინადადებებით, ამის შემდეგ უფრო იოლი იქნება საუბარი. მთავარი მოთხოვნა კვლავ არის სამართლიანი არჩევნები", — აცხადებს ჩიხლაძე.

ოპოზიციური პარტიები, რომლებმაც ცესკოს მონაცემებით 31 ოქტომბრის საპარლამენტო არჩევნებში ბარიერი გადალახეს, ბოიკოტის რეჟიმში არიან და პარლამენტში შესვლაზე უარს ამბობენ, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. დანარჩენები კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას. ელჩებთან ერთად ოპოზიციასა და ხელისუფლებას შორის უკვე 4 რაუნდი გაიმართა.