მეტი თავისუფლება — გირჩის ლიდერის, ზურაბ ჯაფარიძის განცხადებით, ხელისუფლება მოწადინებული კი არ არის, რომ პოლიტიკური კრიზისი განმუხტოს, არამედ გადასულია მცდელობებზე, რომ ვინმე შეიტყუოს პარლამენტში და დახატოს სურათი, რომ იგი მრავალპარტიულია.

"რაც აინტერესებს არის, არა მართლა პოლიტიკური კრიზისის განმუხტვა, არამედ სურათის დახატვა. მანდ ცდება, ჩემი აზრით, იმიტომ, რომ პოლიტიკური კრიზისი არ გამოიხატება იმაში, ოპოზიციონერები არაინ პარლამენტში თუ არ არიან. კრიზისი არის ადამიანების გულებში და ტვინებში [...] მაგ კრიზისს, იქ ხალხის შეტყუება ვერ განმუხტავს. თუ ხელისუფლებამ ეს არ გაიაზრა, რომ მართლა კრიზისი არის განსამუხტი და არ ვთამაშობთ სურათის დახატვაზე, მანამდე იქ [მოლაპარაკებებზე] არაფერი არ გამოვა", — განაცხადა ჯაფარიძემ ფორმულას ეთერში.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.