ქართული ოცნების აღმასრულებელი მდივნის, ირაკლი კობახიძის განცხადებით, ოპოზიციის დეპუტატებს მანდატი ფასილიტატორების თხოვნით არ შეუწყვიტეს. მანამდე კობახიძე ამბობდა, რომ ნებისმიერ ოპოზიციონერს, ვინც პარლამენტს ამ მოთხოვნით მიმართავდა, სურვილს დაუკმაყოფილებდნენ.

რუსთავი 2-ის წამყვანის კითხვაზე, რატომ არ გაუუქმდათ დეპუტატებს მანდატი კობახიძის დაპირებისამებრ 2020 წლის ბოლოს, ის პასუხობს:

"მე არ მახსოვს ვადები დავაკონკრეტე თუ არა, მაგრამ მნიშვნელობა არ აქვს. ჩვენ თხოვნა მივიღეთ საერთაშორისო... ჩვენ ყველაფერი გადაწყვეტილი გვქონდა და გვაქვს, მაგრამ იყო საერთაშორისო პარტნიორების თხოვნა, რომ დეკემბრში არ გვეჩქარა. შესაბამისად, ჩვენ დავიტოვეთ დრო, რეგლამენტი იძლეოდა ამის საშუალებას და გადავდეთ ეს ყველაფერი თებერვლის პირველ კვირამდე".

ოპოზიციური პარტიები, რომლებმაც ცესკოს მონაცემებით ბარიერი გადალახეს ბოიკოტის რეჟიმში არიან და პარლამენტში შესვლაზე უარს ამბობენ, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. დანარჩენები კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.