კორონავირუსმა ბოლო, მეშვიდე კონტინენტის ნაპირებზეც მიაღწია. ანტარქტიდაზე — კონტინენტზე, რომელმაც თითქმის ერთი წელი დაავადებისგან თავის არიდება მოახერხა და ამ ხნის განმავლობაში პანდემიისგან ყველაზე დაცულ ადგილად მიიჩნეოდა — COVID-19-ის პირველი შემთხვევები დადასტურდა.

ინფორმაციას The Guardian და ABC ადგილობრივ გამოცემებზე დაყრდნობით ავრცელებენ. ყინულოვან კონტინენტზე მდებარე გენერალ ბერნარდო ო'ჰიგინს რიკველმეს კვლევით ბაზაზე ვირუსით ინფიცირება 36 ადამიანს დაუდასტურდა, რომელთაგან 26 ჩილეს არმიის წევრია. ამასთან, კორონავირუსით დაინფიცირდა ჩილეში დაბრუნებული სამი ადამიანიც, რომელიც ანტარქტიდის კვლევით ბაზაზე პერსონალის დასახმარებლად გემით იმყოფებოდა.

"დროულად მიღებული პრევენციული ღონისძიებების წყალობით, შესაძლებელი გახდა, პერსონალი PCR ტესტით შემოწმებულიყო, რომლის შედეგადაც 36 მათგანის შედეგი დადებითი აღმოჩნდა", — ნათქვამია ჩილეს სახმელეთო არმიის ოფიციალურ განცხადებაში.

36 ინფიცირებული ჩილეში, ქალაქ პუნტა-არენასში დააბრუნეს, სადაც ისინი მკაცრი იზოლაციის პირობებში იქნებიან.

გენერალ ბერნარდო ო'ჰიგინს რიკველმეს სადგური ანტარქტიდის კონტინენტზე მდებარე ჩილეს 13 კვლევითი ბაზიდან ერთ-ერთია.

ფოტო: Antarctica New Zealand

მიუხედავად იმისა, რომ კონტინენტს მუდმივი მოსახლეები არ ჰყავს, ზამთრისთვის იქ დაახლოებით 1 000 მკვლევარი დარჩა, ტურისტების მიღება კი, რომელთა რიცხვიც, როგორც წესი, რამდენიმე ათასს მოიცავს, ჯერ კიდევ წლის დასაწყისში შეიზღუდა.

ვირუსის მასობრივად გავრცელებისგან თავის ასარიდებლად ამ დროისათვის ყველა მნიშვნელოვანი სასწავლო პროექტი შეჩერებულია, შესაბამისად, შეჩერებულია მთელი მსოფლიოდან ჩასული მკვლევრების კვლევითი საქმიანობაც. იმის გათვალისწინებით, რომ ყინულოვან კონტინენტზე ძლიერი ქარი და უკიდურესად დაბალი ტემპერატურაა, ამასთან, დროული დახმარების მიღებაც არაა ადვილი, ანტარქტიდის ადგილობრივი პროგრამების მენეჯერთა საბჭო აცხადებს, რომ მკვლევრებისთვის პანდემია განსაკუთრებულ საფრთხეს წარმოადგენს, კორონავირუსს კი კონტინენტისთვის "კატასტროფული" შედეგების მოტანა შეუძლია.