The Economist 2016 წლის დემოკრატიის ინდექსს აქვეყნებს, სადაც აღნიშნულია, რომ საქართველო ჰიბრიდული ქვეყნების სიაში მეორე ადგილს იკავებს, ხოლო მსოფლიოს მასშტაბით, 78-ე ადგილზეა ქულით - 5,93, მაშინ როცა 2015 წელს მინიჭებული საერთო ქულა 5,88, 2014 წელს კი - 5,82 იყო.

აღმოსავლეთ ევროპის ქვეყნებს შორის, რეგიონალურ რეიტინგში, საქართველო მე-14 ადგილს იკავებს რუმინეთის, სერბეთისა და მოლდოვის შემდეგ.

ფოტო: The Economist

The Economist წერს, რომ აღმოსავლეთ ევროპის დემოკრატიის ინდექსმა, ბოლო წლებში უკან დაიხია, რაც მათივე შეფასებით, პოლიტიკური კულტურის ნაკლებობამ გამოიწვია. მათ შორის ვერცერთი სრულყოფილი დემოკრატიის მქონე ქვეყანა ვერ მოხვდა, მიუხედავად იმისა რომ აღმოსავლეთ ევროპის 11 ქვეყანა ევროკავშირის წევრია:

"2016 წელს, აღმოსავლეთ ევროპის დემოკრატიის ინდექსი ყველაზე დაბალი იყო, რიგ ქვეყნებში განცდილი რეგრესის, სტაგნაციის, ან მხოლოდ ოდნავ გაუმჯობესებული სიტუაციების გამო. მას შემდეგ, რაც 2006 წელს დავიწყეთ დემოკრატიის ინდექსის დადგენა, რეგიონული, აღმოსავლეთ ევროპის საშუალო ქულა წელს ყველაზე მეტად 5,76-დან 5,43-მდე დაეცა".

აღმოსავლეთ ევროპის რეგიონში ქვეყნები 3 ჯგუფად იყოფიან, მათ შორის ევროკავშირის წევრები მოხვდნენ, რომლებიც არასრულყოფილი დემოკრატიის მქონე ქვეყნებად განიხილებიან, საშუალო ჯგუფში, ანუ ჰიბრიდული რეჟიმში კი მოხვდნენ: ბალკანეთის ქვეყნები, საქართველო, მოლდოვა, უკრაინა და ყირგიზეთი.

2016 წლის მონაცემებით, სომხეთმა ჰიბრიდულიდან, ავტორიტარული რეჟიმის ქვეყნების სიაში მეოთხე ადგილი დაიკავა. მათ შორის არის აზერბაიჯანი, 148-ე ადგილზე და რუსეთი 134-ე ადგილზე. თურქეთი ისევ ჰიბრიდული რეჟიმის ქვეყნებს შორის რჩება. მისი დემოკრატიის ინდექსი 2016 წელს 5,04 ქულით შეფასდა და საერთო რეიტინგში 97-ე ადგილი დაიკავა.

აღსანიშნავია ისიც, რომ 2016 წელს, ამერიკის შეერთებული შტატები არასრულყოფილი დემოკრატიის მქონე ქვეყნების სიაში მოხვდა.