BBC-ის ინფორმაციით, მსოფლიო ჯანდაცვის ორგანიზაცია 2016 წლის ზაფხულში ზიკა ვირუსის გავრცელების საფრთხეზე მთავრობებს აფრთხილებს. ვირუსის გავრცელება რისკი განსაკუთრებით არის შავი ზღვის სანაპიროზე, კონკრეტულად კი რუსეთსა და საქართველოში, ასევე, კუნძულ მადეირაზე. სწორედ აქ ბინადრობენ ზიკა ვირუსის გადამტანი Aedes ჯგუფის კოღოები.

ქვეყნებს შორის, სადაც ვირუსის გავრცელების საშუალო რისკია, შედის საფრანგეთი, საბერძნეთი, იტალია და ესპანეთი.

მსოფლიო ჯანდაცვის ორგანიზაცია (HWO) რეკომენდაციას აძლევს მთავრობებს, გააუვნებელყოფნ ის ადგილები, სადაც ვირუსის გადამტანი კოღო ცხოვრობს და გააფრთხილონ ორსული ქალები მოსალოდნელი საფრთხეების შესახებ.

დაავადებათა კონტროლის ეროვნულ ცენტრში On.ge-ს განუცხადეს, რომ WHO-სგან ოფიციალური გაფრთხილება არ მიუღიათ, თუმცა, იმის გამო, რომ ზიკას გადამტანი კოღოს საქართველოში გავრცელების შესახებ ცნობილი აქამდეც იყო, დასავლეთ საქართველოს სანაპირო ზოლში მიმდინარეობს სადეზინფექციო სამუშაოები. დამატებით ინფორმაციას ცენტრი მოგვიანებით გაავრცელებს.

ჯერჯერობით, პირდაპირი კავშირი არ არის დადგენილი, თუმცა, სპეციალისტთა დიდი ნაწილი ზიკა ვირუსს უკავშირებს ახალშობილებში მიკროცეფალიის განვითარებას. ეს არის სამედიცინო მდგომარეობა, რომელიც ვითარდება ორსულობისას. ემბრიონის ტვინი ზრდას წყვეტს და მშობიარობის დროს, ის ნორმალურზე ბევრად პატარაა. ხანდახან, მიკროცეფალია ახალშობილის სიკვდილსაც იწვევს, ძირითადი ნიშნები კი გონებრივი და ფიზიკური განუვითარებლობაა. მიკროცეფალიის გამოწვევა ზიკა ვირუსს დაუკავშირეს იმიტომ, რომ როცა ის ორსული ქალის ორგანიზმში ხვდება, შემდეგ ემბრიონის ტვინშიც აღწევს. გასულ წელს ზიკა ვირუსის ეპიდემია იყო ლათინური ამერიკის ქვეყნების დიდ ნაწილსა და ჩრდილოეთ ამერიკის კონტინენტზე.

ზიკა ვირუსი თავად ზრდასრული ადამიანისთვის საშიში არაა და შესაძლოა, უსიმპტომოდაც მიმდინარეობდეს რამდენიმე დღის განმავლობაში, რის შემდეგაც ორგანიზმი იმუნიტეტს გამოიმუშავებს. ხანდახან, ვირუსის დროს გამოხატულია სიცხე, დაღლილობა, თვალების ჩაწითლება და სახსრების ტკივილი.

ჯერჯერობით, არ არის შექმნილი ვირუსის საწინააღმდეგო ვაქცინა.