შრომის ჯანმრთელობისა და სოციალური დაცვის მინისტრმა დავით სერგეენკომ იმ ცვლილებებთან დაკავშირებით, რომლებიც ფსიქიატრიულ კლინიკებს შეეხო დამატებითი განმარტებები გააკეთა. სერგეენკოს თქმით, ფსიქიკური პრობლემების მქონე კლინიკების დაფინანსების ბიუჯეტი არ შემცირებულა, არამედ მოხდა დაფინანსების მეთოდოლოგიის ცვლილება. მინისტრი განმარტავს, თუ „რა მოხდა ამ აჟიტირებული მოვლენების უკან“:

„მწვავე შემთხვევების მართვის დროს, როდესაც პაციენტს აქვს მწვავე ფსიქოზი, ასეთი შემთხვევების აბსოლუტურ უმრავლესობაში, ის საჭიროებს სტაციონარში მკურნალობას. ჩვენმა მონიტორინგმა უტყუარად დაადგინა, რომ არც თუ იშვიათ შემთხვევაში მწვავე ფსიქოზის მქონე პაციენტს სტაციონარიდან წერდნენ დროზე ადრე. ის ამ ერთი თვის განმავლობაში ორჯერ ან სამჯერ შედიოდა იგივე, ან სხვა კლინიკაში იმისთვის, რომ ამ კლინიკებს გამოეწერათ ზედმეტი თანხა და ამას აკეთებდნენ პაციენტის უსაფრთხოების ხარჯზე. მწვავე ფსიქოზის დროს პაციენტს განსაკუთრებული მოვლა და მკურნალობა სჭირდება.“

სერგეენკოს შეფასებით, ადამიანთა გარკვეული ჯგუფი ცდილობს წარმოაჩინოს, რომ სამინისტრო წინააღმდეგია საერთაშორისოდ მიღებული მეთოდების. მისივე თქმით, ამის უკან იმ კლინიკების ინტერესები დგას, რომლებიც ამ დღეებში ყველაზე მეტს ხმაურობენ. სერგეენკოს განცხადებით, სამინისტრო მზადაა თანამშრომლობისთვის და პროგრამაში შესაძლოა ცვლილებებიც შევიდეს:

„გამოიკვეთა სამი ჯგუფი: ერთი - რომლებიც გულწრფელად გულშემატკივრობენ პაციენტებს, თუმცა, არ არიან ყველა დეტალში ჩახედული, მეორე, რომელთაც ამოძრავებთ გარკვეული ხეირი. მესამე - პოლიტიკურად ანგაჟირებული ადამიანები. რაც შეეხება საკუთრივ პროგრამას, რომელიც 2017 წელს არის დამტკიცებული - ჯანდაცვის ნებისმიერ პროგრამაში არ არის დოგმატური ფინალი, რომ ამით მთავრდება და ცვლილება არ შევა. ჩვენ ვართ ღია თანამშრომლობისთვის. ის ცვლილებები, რაც გატარდა იყო მხოლოდ პაციენტის ინტერესებიდან გამომდინარე და ეს ცვლილებები არ იქნება ბოლო. რა თქმა უნდა, ვითანამშრომლებთ როგორც არასამთავრობო, ასევე პროფესიულ ორგანიზაციებთან.“