დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის ხელძღვანელის, ამირან გამყრელიძის თქმით, საუბრები იმის შესახებ, რომ კოვიდის ვაქცინა ხელმისაწვდომი 1 ან 3 თვის შემდეგ იქნება, გადაჭარბებული იმედებია. მან მის მოადგილე, პაატა იმნაძესთან და NCDC-ის გადამდებ დაავადებათა დეპარტამენტის ხელმძღვანელ ხათუნა ზახაშვილთან ერთად დღეს, 13 ნოემბერს გამართულ პრესკონფერენციაზე კორონავირუსის შესახებ ჟურნალისტებისა და მოსახლეობაში დაგროვებულ კითხვებს უპასუხეს.

გამყრელიძის თქმით, დღესდღეობით ლაბორატორიებში 150-დან 200-მდე სხვადასხვა ვაქცინაა კოვიდის წინააღმდეგ შექმნილი, აქედან პრეკლინიკური და კლინიკური კვლევის ფაზებში რამდენიმე ათეულია. მათ შორის მესამე კვლევის ფაზაში არის ხუთამდე ვაქცინა, რომლიდანაც სამს ძალიან დიდი მოლოდინი აქვს. NCDC-ის ხელმძღვანელის თქმით, ეს არის გერმანული ერთ-ერთი ბიოტექნოლოგიური კომპანიისა და ფაიზერის მიერ შექმნილი ვაქცინა, სადაც კვლევებმა აჩვენა, რომ 90%-ზე მეტი დამცველობა აქვს, მეორე, ბრიტანული ოქსფორდის უნივერსიტეტისა და ასტრაზენეკას მიერ შექმნილი და მესამე, ამერიკული მოდერნას ვაქცინა. სამივე ვაქცინა ამჟამად კლინიკური კვლევების მესამე ეტაპს გადის.

"დიდი ალბათობით არ იქნება მარტო ერთი ვაქცინა, რომელიც იქნება გამოყენებული კოვიდის საწინააღმდეგოდ. სხვა სახელმწიფოებს 8 მილიარდი დოზა ვაქცინა აქვთ შეკვეთილი. ეს ვაქცინები, რომლებიც არის კვლევაში არის ორჯერადი გამოყენების, ანუ 3 ან 4 კვირის გამოტოვებით ხდება ინექცია, რომ მიიღო მყარი ჰუმორული ან უჯრედული იმუნიტეტი, ანუ დაცვა", — განაცხადა გამყრელიძემ.

მისივე თქმით, ვაქცინის მისაღებად საქართველომ პირველი შენატანი 4 მილიონი აშშ დოლარი უკვე გადარიცხა. ჯამში კი მისი მიღება 17 მილიონი დოლარი ჯდება. გამყრელიძის ინფორმაციით, 700 000 ადამიანისთვის სამყოფი კორონავირუსის ვაქცინის დოზა უკვე შეუკვეთეს. ვაქცინის დამტკიცების შემდეგ კი, პირველ რიგში, რისკჯგუფებში შემავალი ადამიანები აიცრებიან.

"ჩვენ ვართ გაერთიანებული კოლაქს პლატფორმაზე, რომელიც არის შექმნილი გავის მიერ. გავი არის საერთაშორისო ორგანიზაცია — ვაქცინების გლობალური ალიანსი, რომელი ვაქცინაც დამტკიცდება იმის და მიხედვით იქნება გადაწვეტილება მიღებული, რომელ ვაქცინას მიიღებს საქართველო", — ამბობს ამირან გამყრელიძე.

13 ნოემბრის მონაცემებით, საქართველოში კორონავირუსის 3 473 ახალი შემთხვევა გამოვლინდა, გამოჯანმრთელდა 3 342 პირი, გარდაიცვალა — 37.

ქვეყანაში სულ Covid-19-ის 73 154 დადასტურებული შემთხვევაა, მათ შორის გამოჯანმრთელებულია — 55 511 ადამიანი, გარდაცვლილი — 636.
კარანტინის რეჟიმში 2 447 პირი იმყოფება, სტაციონარში მეთვალყურეობის ქვეშ — 4 957
კოვიდ სასტუმროში — 3 413.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: