შინაგან საქმეთა სამინისტრო საქართველოს სხვადასხვა ქალაქში მიმდინარე სპონტანურ აქციებს ეხმაურება. მოქალაქეები აპროტესტებენ ქართული ოცნების გადაწყვეტილებას ევროკავშირთან მოლაპარაკებების გახსნის საკითხის 2028 წლამდე შეჩერებით, რაც, ფაქტობრივად, ქვეყნის ევროატლანტიკურ კურსზე უარის თქმას ნიშნავს.

"შინაგან საქმეთა სამინისტროს სხვადასხვა დანაყოფის თანამშრომლები მართლწესრიგის დაცვის მიზნით, მობილიზებულები არიან საქართველოს მასშტაბით, სხვადასხვა ქალაქში გამართული აქციების მიმდებარე ტერიტორიაზე.

საქართველოს კანონმდებლობით დაცულია შეკრება-მანიფესტაციისა და გამოხატვის უფლება, ასევე, განსაზღვრულია პროტესტის გამოხატვის ფორმები, რათა დაცული იყოს საზოგადოებრივი წესრიგი და უსაფრთხოება.

მოვუწოდებთ აქციის ორგანიზატორებს, პოლიტიკურ ლიდერებს და მონაწილეებს, პროტესტი გამოხატონ კანონით დადგენილ ფარგლებში.

თითოეულ კანონსაწინააღმდეგო ქმედებას, პოლიციის მხრიდან შესაბამისი სამართლებრივი რეაგირება მოჰყვება", — ვკითხულობთ შსს-ს განცხადებაში.