ევროპარლამენტარმა, ანდრიუს კუბილიუსმა განაცხადა, რომ საპარლამენტო არჩევნების შედეგებზე ცდომილება 4 პროცენტამდე ადის და რაც ძალიან დიდ კითხვის ნიშნებს ბადებს. ამის შესახებ კუბილიუსმა ფორმულას ეთერში ისაუბრა.

"პირველ რიგში, მოვუწოდებ და ვაკეთებ მოთხოვნას, ყველა დარღვევაზე შესაბამისი შესწავლისა. ეს უნდა გაკეთდეს იმ ორგანიზაციების მიერ, რომელიც არის პასუხისმგებელი. ეს არის საარჩევნო კომისია, ასევე, საერთაშორისო დამკვირვებლები — ეუთო/ოდირი, ევროპის საბჭოს საპარლამენტო ასამბლეის დელეგაცია. მოვუწოდებ, განიხილონ ყველა საჩივარი, რომელიც ოპოზიციის მიერ იყო წარმოდგენილი. ასევე, ძალიან მნიშვნელოვანია შეფასება ავტორიტეტული არასამთავრობოების მიერ, როგორიცაა ISFED. მათი განცხადების ციტირებას მოვახდენ, რომ დაახლოებით, 8 პროცენტი იყო მათ ოქმებში, განსხვავება ბიულეტენის ციფრებს შორის იყო, რამდენი ბიულეტენი იყო და რამდენმა ამომრჩეველმა მიიღო არჩევნებში მონაწილეობა. ცდომილება 4 პროცენტამდე ადის. 4 პროცენტი საქართველოში პროპორციულ სისტემაში საკმაოდ დიდი განსხვავებაა. ამერიკაში 1 პროცენტიც კი ძალიან დიდ განსხვავებას ქმნის და ძალიან ბევრი დისკუსიები მოსდევს, თუ რა შედეგები შეიძლება დადგეს სხვადასხვა შტატებში. საქართველოში თუ 4 პროცენტზეა საუბარი, ეს საკმაოდ დიდ კითხვის ნიშნებს ბადებს არჩევნების რეალურ შედეგებზე", — განაცხადა ანდრიუს კუბილიუსმა.

მისივე თქმით უნდა განიხილონ ყველა საჩივარი და დიალოგის მეშვეობით საუკეთესო გადაწყვეტილება იქნას მიღებული, თუ როგორ დაძლიოს საქართველომ ეს გამოწვევა.

"ჩვენ ყურადღებით ვაკვირდებით მოვლენებს საქართველოს. საქართველო გახლავთ საკმაოდ რთულ რეგიონში, სამხრეთ კავკასიაში, სადაც სომხეთსა და აზერბაიჯანს შორის კონფლიქტია და მოვუწოდებ მმართველ და ოპოზიციურ პარტიას, მნიშვნელოვანი ანალიზი გაუკეთონ იმ გამოწვევებს, რომელიც არჩევნების პირველი ტურის შემდეგ დადგა", — აღნიშნა კუბილისმა.

31 ოქტომბრის საპარლამენტო არჩევნების შედეგებს ოპოზიცია არ აღიარებს. ოპოზიცია, ასევე, ასაჩივრებს არჩევნების შემაჯამებელ ოქმებს და გადაცდომებზე საუბრობს. ბარიერგადალახულმა რვავე პარტიამ პარლამენტში შესვლაზე უარი განაცხადა. გარდა ამისა, ისინი მეორე ტურებში მონაწილეობაზეც უარს ამბობენ, რომელიც 17 ოლქში გაიმართება.

პატრიოტთა ალიანსის გარდა, პარტიები ერთობლივ საპროტესტო აქციებს აწყობენ. ისინი მოითხოვენ, რომ ცენტრალური საარჩევნო კომისიის ახალი ადმინისტრაციის პირობებში ხელახალი არჩევნები ჩატარდეს.

ოპოზიციის ბრალდებებს უარყოფენ ქართულ ოცნებაში. როგორც მმართველ პარტიაში აცხადებენ, ისინი მზად არიან დიალოგისთვის, თუ ოპოზიცია არჩევნების შედეგებს პატივს სცემს.

ქართული ოცნების გენერალურმა მდივანმა და თბილისის მერმა, კახა კალაძემ მოუწოდა პოლიტიკურ პარტიებს, რომ ქუჩის ნაცვლად პროცესმა მოლაპარაკებების პროცესში გადაინაცვლოს და ამაში საერთაშორისო პარტნიორებიც ჩაერთონ.

12 ნოემბერს კი ოპოზიცია და ხელისუფლება საქართველოში ამერიკის ელჩს, კელი დეგნანს შეხვდნენ. შეხვედრის დასრულების შემდეგ ორივე მხარემ განაცხადა, რომ ელჩთან შეხვედრა განმეორებითაც იგეგმება და ამ ეტაპზე აღსანიშნავია ის ფაქტი, რომ პროცესი დაიწყო, ხოლო რა შედეგებს მოიტანს დიალოგი, ამაზე მსჯელობა ნაადრევია. ოპოზიციაში ამბობენ იმასაც, რომ მიუხედავად უკვე გამართული და მომავალში დაგეგმილი შეხვედრისა, შაბათს დაანონსებული აქცია არ გადაიდება და ისევ ჩატარდება.

ამავე თემაზე: