მსოფლიო პანდემიამ განათლების ინდუსტრია არაერთი გამოწვევის წინაშე დააყენა. მოსწავლეებსა და სტუდენტებს მოულოდნელად მოუწიათ სწავლების სრულიად დისტანციურ რეჟიმზე ადაპტირება. ეს პროცესი ბევრი უფროსკლასელისა და ზრდასრული სტუდენტისთვის აღმოჩნდა რთული. განსაკუთრებით გაუგებარ მდგომარეობაში კი დაწყებითი კლასის მოსწავლეები აღმოჩნდნენ, რომლებიც სკოლაში სიარულით არამხოლოდ ცოდნას, არამედ ფიზიკური განვითარებისთვის და სოციალური ცხოვრების დასაწყებად აუცილებელ უნარებს იძენდნენ.

ასეთ სიტუაციაში განსაკუთრებით მნიშველოვანია არაფორმალური და არააკადემიური საგანმანათლებლო დაწესებულებები, რომლებიც ბავშვებს არამხოლოდ ცოდნის მიღების საშუალებას, არამედ გართობისა და სილაღის შესაძლებლობასაც აძლევენ.

სწორედ ამ მოტივაციით შეიქმნა წიგნების თაროს სკოლა I-IV კლასამდე ბავშვებისთვის, რის შესახებაც კომპანია წიგნების თაროს კრეატიული დირექტორი, ალექსანდრე ლორთქიფანიძე საუბრობს.

"როგორც კი პანდემია გამოცხადდა და სკოლებში სასწავლო პროცესი შეწყდა, მაშინვე დავიწყეთ ფიქრი, როგორ შეიძლებოდა პატარა ბავშვებისთვის ეს რთული პერიოდი შეგვემსუბუქებინა და თან, რაც შეიძლება პროდუქტიული გაგვეხადა. სწორედ ამ მიზნით შეიქმნა წიგნების თაროს სკოლა. ამ დროისთვის უკვე ორი წარმატებული კურსი ჩავატარეთ. სკოლა ამ პერიოდში განვითარდა, ჩვენც გამოცდილება დავაგროვეთ და მესამე კურსისთვის სრულიად შევცვალეთ და დავხვეწეთ საგნები.

ამ ეტაპზე წიგნების თაროს სკოლის მიზანია, შემოიღოს სრულიად განსხვავებული, არაფორმალური განათლების მეთოდები. სწავლის პროცესი მოსწავლეებისთვის და, განსაკუთრებით, დაწყებითი კლასის მოსწავლეებისთვის, არ უნდა ასოცირდებოდეს დაღლასა და სტრესთან. ამიტომ, ჩვენი პრინციპია — შემეცნება გართობით და განსაკუთრებით საინტერესოა, რომ ჩვენთან მასწავლებლები თავად სტუდენტები და დამამთავრებელი კლასის მოსწავლეები არიან, რაც სასწავლო პროცესს უფრო უშუალოს ხდის", — აცხადებს ლორთქიფანიძე.

წიგნების თაროს სკოლაში ჩართვა მოსწავლეებს მსოფლიოს ნებისმიერი წერტილიდან შეუძლიათ, რადგან სასწავლო პროცესი ონლაინ მიმდინარეობს. ამის მიუხედავად, სკოლაში მნიშვნელოვანი როლი ენიჭება ინდივიდუალურ მიდგომას, რაც თითოეული ბავშვის განვითარებისთვის აუცილებელია.

გარდა ამისა, მოსწავლეებს აქვთ უნიკალური შესაძლებლობა — შეხვდნენ სკოლაში მოწვეულ სტუმრებს. პროფესიონალებს, რომლებიც მათ თითოეულ საგანში ერთ გაკვეთილს ჩაუტარებენ.

ესენი არიან:

შემოქმედებითი აზროვნება და ესთეტიკის აღქმა — ზალიკო სულაკაური;

რიტორიკული აზროვნება და საუბრის ხელოვნება — ნინო კასრაძე;

ადამიანი და ჯანმრთელობა — მაია ცირამუა;

დედამიწა და კოსმოსი — ზურაბ გურიელიძე;

ლოგიკა და მათემატიკური თავსატეხები — ლევან გიგინეიშვილი;

მითოლოგია და ცივილიზაციები — ნატო დავითაშვილი.

"არაფორმალური განათლების შესაძლებლობა უდიდესი საჩუქარია ბავშვებისთვის ამ რთულ დროში, როცა მათი ყოველდღიური ცხოვრება რადიკალურად შეიცვალა და თანატოლებისა და საყვარელი საქმიანობის გარეშე პირისპირ აღმოჩნდნენ არასტრუქტურირებულ დროსთან და დიდ გაურკვევლობასთან. მგონია, რომ ასეთი შეთავაზება ერთ-ერთი საშუალებაა სტრესთან გამკლავებისათვის. ბავშვები ახალ ამპლუაში — მასწავლებლების როლში, ეს თამაშს ჰგავს, რომელიც ახლა ასე სჭირდებათ ბავშვებს და ამავდროულად თვითრეფლექსიის, ცოდნის მიღების, ახალი როლების მორგების საუკეთესო საშუალებაცაა. მიხარია, რომ მეც ამ პროცესის მონაწილე ვარ და ბავშვებთან მომიწევს საუბარი იმ მითებზე, რაც არსებობს ფსიქიკური ჯანმრთელობის საჭიროებების მქონე ადამიანებზე. მე მათთან ფსიქიკური ჯანმრთელობაზე ვისაუბრებ და შევეცდები ხელი შევუწყო დამკვიდრებული სტერეოტიპების მსხვრევას", — მაია ცირამუა, ბავშვთა ფსიქოლოგი.

წიგნების თაროს სკოლის მესამე კურსზე რეგისტრაცია უკვე დაწყებულია და 7 ნოემბრამდე გრძელდება, საგაკვეთილო პროცესი კი 16 ნოემბრიდან დაიწყება. სკოლის შესახებ ინფორმაციის ნახვა შესაძლებელია მისამართზე: school.wignebistaro.ge.

ადგილები შეზღუდულია.

წიგნების თაროს სკოლის პარტნიორები არიან საქართველოს ბანკი, სულაკაურის გამომცემლობა და საქართველოს პარლამენტის ეროვნული ბიბლიოთეკა.

წიგნების თაროს სკოლის მედია პარტნიორია ონლაინ გამოცემა On.ge.

კომპანია წიგნების თარო ქართული ბრენდია, რომელიც საბავშვო და ახალგაზრდულ, შემეცნებით-გასართობ პროექტებს ახორციელებს. ამავე სახელწოდების სატელევიზიო შოუ, რომელიც 2016 წლიდან საზოგადოებრივი მაუწყებლის პირველი არხის ეთერში გადაიცემა, კომპანიის საავტორო პროექტია. 2020 წელს წიგნების თარო საქართველოს წიგნის გამომცემელთა და გამავრცელებელთა ასოციაციამ წლის მთავარი პრიზით, წიგნის ქომაგი 2020-ით დააჯილდოვა.