ქართული ოცნების დეპუტატი, გიორგი კახიანი ამბობს, რომ თუ ოპოზიცია არ მიიღებს მონაწილეობას საპარლამენტო ცხოვრებაში, სამართლებრივი თვალსაზრისით პარლამენტის ფუნქციონირებას პრობლემა არ შეექმნება, მაგრამ მისი თქმით, იგი მათ მონაწილეობას ამ პროცესებში ისურვებდა.

"პირადად მე თუ მკითხავთ, ჩემს პოლიტიკურ შეხედულებას, ვისურვებდი, რომ ოპოზიციამ მიიღოს მონაწილეობა საპარლამენტო ცხოვრებაში, ჩვენ ძალიან კარგად გვესმის, ოპოზიციის როლი ზოგადად, პოლიტიკურ ცხოვრებაში, ამას ჩვენ, რა თქმა უნდა, ვითვალისწინებთ. ნაციონალური მოძრაობა პარლამენტში იქნება თუ გარეთ, დიდ აზრს ვერ ვხედავ, იმიტომ, რომ ამ გუნდში ვერ ვხედავ კონსტრუქციულ ოპოზიციას, თუმცა იქ არიან სხვა ოპოზიციური ჯგუფები, რომელთა მონაწილეობა საპარლამენტო ცხოვრებაში იქნება საინტერესო და მნიშვნელოვანი და ჩვენ დარწმუნებულნი ვართ, რომ ამას აუცილებლად ვნახავთ", — განაცხადა კახიანმა.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.