მართლმადიდებელი ეკლესიის კათოლიკოს-პატრიარქი ილია მეორე მოუწოდებს საზოგადოებას, რომ არჩევნებში მიიღონ მონაწილეობა, რათა გამოვლინდეს უმრავლესობის ნება.

"საქართველოს ეკლესიის სასულიერო პირებს, მრევლს, საქართველოს მოსახლეობას 31 ოქტომბერს საშუალება ეძლევა გააკეთოს არჩევანი ქვეყნის ხვალინდელ დღესთან დაკავშირებით.

ეკლესია ყოველთვის იყო და არის ხალხის გამაერთიანებელი ძალა და პოლიტიკური მიკერძოება მისთვის უცხოა. ჩვენი ხალხი გონიერია და, მიუხედავად სხვადასხვა მცდელობისა, კარგად აფასებს მოვლენებს. ამიტომაც მოგმართავთ ყველას, მიიღეთ მონაწილეობა არჩევნებში, რათა გამოვლინდეს უმრავლესობის ნება და თითოეული თქვენგანი სწორი გადაწყვეტილებით დაეხმაროს სამშობლოს", — წერია საპატრიარქოს განცხადებაში.

პატრიარქი ხვალ არჩევნებში მონაწილეობას გადასატანი საარჩევნო ყუთით მიიღებს.

ხვალ, 31 ოქტომბერს საქართველოში საპარლამენტო არჩევნები იმართება. ისტორიაში პირველად არჩევნები პროპორციულთან მიახლოებული, 120/30-ზე სისტემით გაიმართება. საარჩევნო უბნები 8 საათზე გაიხსნება.