განახლება: მასალის თავდაპირველი სათაური იყო — გამყრელიძის თქმით, საბჭო მსჯელობს თბილისში ფართომასშტაბიანი შეზღუდვების დაწესებაზე — რაც უზუსტობის გამო შეიცვალა. თავდაპირველად ბრიფინგზე გამყრელიძემ აღნიშნა, რომ შემზღუდავ ღონისძიებებზე "მსჯელობა მიმდინარეობს" და საბჭო ორშაბათს გადაწყვეტდა რა შეზღუდვას დააწესებდა ან დააწესებდა თუ არა საერთოდ. მოგვიანებით კი იმავე ბრიფინგზე მან განაცხადა, რომ ფართომასშტაბიანი შეზღუდვები არ იგეგმება.

დაავადებათა კონტროლის ცენტრის დირექტორმა, ამირან გამყრელიძემ ბრიფინგზე განმარტა, რომ ფართომასშტაბიანი შეზღუდვები არ იგეგმება არც დედაქალაქში და არც სხვა რეგიონებში.

"დღეს ჩვენ გავითავისეთ უკვე, რომ კორონავირუსულ ინფექციას ერთ და ორ დღეში ვერ გავაქრობთ, ვერც ორ თვეში და, შეიძლება, კიდევ ვერც ერთ წელიწადში. ამიტომ უნდა ვისწავლოთ თანაცხოვრება კორონავირუსთან ერთად. ამიტომ ფართომასშტაბიანი შემზღუდავი ღონისძიებები, მათ შორის, არა ლაითურში და გურიაში, არამედ თბილისშიც არ იგეგმება", — აღნიშნა მან.

ამავე ბრიფინგის დასაწყისში კი კითხვაზე, დედაქალაქში კოვიდინფიცირების შემთხვევების მატებისას განიხილება თუ არა იმავე შეზღუდვების დაწესება, რაც ბათუმშია, გამყრელიძე უპასუხა:

"რაც შეეხება ფართომასშტაბიან შემზღუდავ ღონისძიებებს, ამაზე მიმდინარეობს მსჯელობა და იმედი მაქვს, რომ ორშაბათს, რა ტიპის იქნება, თუ როგორი, ან იქნება, თუ არ იქნება, მიღებული იქნება საკოორდიანციო საბჭოზე და ყველასთვის გახდება ცნობილი".

თბილისის ინფექციური საავადმყოფოს ბოქსირებული განყოფილების ხელმძღვანელის, მარინა ენდელაძის ინფორმაციით, კორონავირუსის 527 ახალი შემთხვევიდან 190 აჭარიდანაა, თბილისიდან — 179. ინფიცირებულთა რაოდენობით მესამე ადგილზეა იმერეთი 91 ახალი შემთხვევით. სხვა რეგიონებში დღევანდელი სტატისტიკა ასეთია:

ქვემო ქართლი — 28, შიდა ქართლი — 10, კახეთი — 11, მცხეთა-მთიანეთი და გურია — 3, სამცხე-ჯავახეთი — 1.

ენდელაძის თქმით, მოსახლეობის სიმჭიდროვის მიხედვით, ყველაზე საშიში ვითარება, ეპიდემიოლიგიური კუთხით, ამ დროისათვის თბილისშია.

9 ოქტომბერს საქართველოში კორონავირუსის 527 ახალი შემთხვევა დადასტურდა, 313 გამოჯანმრთელდა, გარდაიცვალა 6 პაციენტი.

სულ კორონავირუსის 1 0752 შემთხვევაა დადასტურებული. აქედან, 5 866 ადამიანი უკვე გამოჯანმრთელდა. გარდაიცვალა — 72.

ამ დროისთვის კარანტინის რეჟიმში 5 574 ადამიანი იმყოფება, სტაციონარში მეთვალყურეობის ქვეშ კი — 836. კოვიდ სასტუმროში 1 338 პირი მკურნალობს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: