საქართველოს სახალხო დამცველი და სახალხო დამცველთან არსებული რელიგიათა და ეროვნულ უმცირესობათა საბჭოები ყარაბაღის კონფლიქტის განახლებას ეხმაურებიან და სახელმწიფო უწყებებს მოუწოდებენ აქტიურად ითანამშრომლონ შესაბამისი ეთნიკური ჯგუფების წარმომადგენლებთან, სათემო, რელიგიურ ლიდერებთან და ორგანიზაციებთან ტოლერანტული გარემოს შენარჩუნებისა და განმტკიცებისთვის.

განცხადების ავტორები, ასევე, მოქალაქეებს მოუწოდებენ, რომ სიძულვილის ენის გამოყენებისგან მაქსიმალურად შეიკავონ თავი, მათ შორის სოციალურ ქსელებში.

"საქართველოს მოქალაქეების სამშობლო საქართველოა. შესაბამისად, ჩვენ ვალდებული ვართ მშვიდობა, შემწყნარებლობა და თანადგომა გამოვიჩინოთ ერთმანეთის მიმართ, და იგივე მოვითხოვოთ ხელისუფლებისგან.

მოვუწოდებთ საქართველოს ყველა მოქალაქეს — ვისთვისაც ძვირფასია ჩვენ ქვეყანაში და რეგიონში მშვიდობა და უსაფრთხოება, მაქსიმალურად შეიკავონ თავი ეთნო-რელიგიური ან სხვა ნიშნით სიძულვილის ენის გამოყენებისგან, მათ შორის სოციალური ქსელების მეშვეობით", — აღნიშნავს ომბუდსმენი.

სახალხო დამცველი და რელიგიათა და ეროვნულ უმცირესობათა საბჭოები თხოვნით მიმართავენ მედიას, რომ განსაკუთრებული სიფრთხილით მოეკიდონ იმ ტიპის ინფორმაციის გავრცელებას, რამაც შეიძლება ხელი შეუწყოს ეთნოსებს შორის ურთიერთობაში დაძაბულობის შემოტანასა და გაღრმავებას.