უამრავი ადამიანი, მიუხედავად მსოფლიოში გართულებული ეპიდსიტუაციისა, მაინც უარს აცხადებს პირბადის ტარებაზე და, როგორც ჩანს, საპირისპიროს ვერაფრით დავუმტკიცებთ. მათ მეცნიერული ფაქტებიც კი ვერ უცვლის აზრს. რისი გაკეთება შეუძლია ხელისუფლებას ამის აღსაკვეთად?

სწორედ ამ კითხვის პასუხის ძიებაში მიაგნო სადამსჯელო ხერხს კუნძულ იავას ადგილობრივმა ხელისუფლებამ ინდონეზიაში. აღმოსავლეთ იავას პროვინციაში, გრესიკის ადმინისტრაციულ ერთეულში, 8 ადამიანს, რომელიც უარს ამბობდა პირბადის ტარებაზე, ადგილობრივმა ხელისუფლებამ კორონავირუსით გარდაცვლილების საფლავები გაათხრევინა.

COVID-19-ის პანდემიის გამო, ის ადამიანები, ვინც პირბადეს არ ატარებს, ინდონეზიაში ჯარიმდებიან ან საზოგადოებისთვის სასარგებლო საქმიანობის შესრულება ევალებათ.

ზემოხსენებული სადამსჯელო მეთოდი ერთ-ერთი რაიონის მმართველს, სუიონოს, ეკუთვნის.

"ამ დროისათვის მხოლოდ სამ ადამიანს შეუძლია საფლავების გათხრა, ამიტომ, ვიფიქრე, პირბადის ტარების მოწინააღმდეგეებსაც მათთან ერთად ემუშავათ", — ამბობს სუიონო, — "ვიმედოვნებ, ამ გზით ძალადობასაც აღვკვეთთ".

რვა კანონდამრღვევს საფლავების გათხრა ორ ჯგუფად დაყოფილს დაევალა, თუმცა მათთვის სავალდებულო არ იყო დაკრძალვის სხვა მომსახურეობაში მონაწილეობის მიღება.

ხელისუფლების მოთხოვნები პირბადის ტარებასთან დაკავშირებით, უდროო ნამდვილად არაა. ინდონეზიაში კვლავ იმატებს კორონავირუსის შემთხვევები. მხოლოდ 14 სექტემბერს 3 141 ახალი შემთხვევა დაფიქსირდა, მთლიანობაში კი ქვეყანაში 221 523 დადასტურებული შემთხვევაა აღრიცხული. ამ გარემოებების გათვალისწინებით, დედაქალაქ ჯაკარტაში შეზღუდვები გამკაცრდა: შეიზღუდა სოციალური, ეკონომიკური, რელიგიური, კულტურული და აკადემიური საქმიანობა. ნებადართულია მხოლოდ 11 სასიცოცხლოდ მნიშვნელოვანი სექტორის მუშაობა, მათ შორის კვების, სამშენებლო და საბანკო ინდუსტრიის. ამასთან, ამ ობიექტებზეც თანამშრომლების მხოლოდ ნახევარი მუშაობს მკაცრი პროტოკოლის დაცვით. ინდონეზიაში დახურული რჩება სკოლები, პარკები და სარეკრეაციო ადგილები. რაც შეეხება რესტორნებს და კაფეებს, მათ ნაწილობრივ შეუძლიათ საქმიანობის განხორციელება პროდუქტის ადგილზე მიწოდებით ან მომხმარებლისთვის თან გატანების სერვისით.

გართულებული ეპიდსიტუაციაა საქართველოშიც. ქვეყანაში დღეს ახალი რეკორდი დაფიქსირდა — დადასტურდა კორონავირუსის 170 ახალი შემთხვევა. მთლიანობაში საქართველოში ამ დრომდე 2 562 შემთხვევაა დაფიქსირებული, აქედან 1 381 გამოჯანმრთელებულია, კარანტინის რეჟიმში კი 6 633 ადამიანი იმყოფება. გარემოებების გათვალისწინებით, საქართველოს დიდი ქალაქების სკოლებში სწავლა დღეს კვლავ დისტანციურად განახლდა. მიუხედავად ამისა, მთავრობის ადმინისტრაციის ხელმძღვანელის, ნათია მეზვრიშვილის, თქმით, სრული კარანტინის და საგანგებო მდგომარეობის გამოცხადება არ იგეგმება.

საიმედო შედეგს პროგნოზირებს პირველი საუნივერსიტეტო კლინიკის დირექტორი, ლევან რატიანიც, რომელიც აცხადებს, რომ ექიმებმა კორონავირუსთან ბრძოლა ისწავლეს და "ამ ომს მთელი სამყარო წარმატებით დაასრულებს". ამირან გამყრელიძის თქმით, ვირუსთან ბრძოლაში ყველაზე ეფექტურ იარაღად კვლავ ფიზიკური დისტანცია, ხელების დაბანა და პირბადის ტარება რჩება.

დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144