საზოგადოებრივ ტრანსპორტში ვინმე უცხო რომ დაამთქნარებს და მერე ჩვენც ვიწყებთ მთქნარებას — ეს, ალბათ, ყველას მოგვსვლია. მთქნარება საკმაოდ ხშირია ხერხემლიანებში (განსაკუთრებით ზარმაცებში), მაგრამ გადამდები მთქნარება უფრო იშვიათი ფენომენია.

Frontiers in Veterinary Science-ში გამოქვეყნებული ახალი კვლევის მიხედვით, დედამიწის გიგანტურ გენიოსებს, სპილოებს, მთქნარება შეიძლება ადამიანისგანაც გადაედოთ, როგორც ეს ზოოპარკში მყოფ სპილოებსა და მათ მომვლელებზე დაკვირვებით დაასკვნეს.

ზუსტად რატომაა მთქნარება გადამდები, ჯერჯერობით ბოლომდე გასაგები არა, თუმცა ერთი კვლევის თანახმად, ეს თანაგრძნობასთან უნდა იყოს დაკავშირებული. აქამდე სახეობათაშორისი გადამდები მთქნარება მხოლოდ ძაღლებსა და შიმპანზეებში იყო შემჩნეული, მაგრამ, როგორც ჩანს, მათ სიას სპილოებიც შეემატნენ, თუმცა მათ მთქნარება მხოლოდ ნაცნობი და ახლობელი ადამიანებისგან გადაედებათ.

ნიუ-მექსიკოს უნივერსიტეტის წარმომადგენელმა ზოი როსმანმა ადამიანისგან სპილოზე მთქნარების გადადება პირველად 2017 წელს შეამჩნია, როდესაც ის დატყვევებულ ცხოველებს შეისწავლიდა. ამ მოვლენის შესწავლის მიზნით ის გაერთიანდა სპილოების სამხრეთაფრიკულ სამაშველო დაწესებულებასთან, კნისნას სპილოების პარკთან, და ისინი შეისწავლიდნენ, რამდენად ზრდიდა სპილოსა და ადამიანის სიახლოვე მთქნარების გადადების ალბათობას.

როსმანმა სპილოების საყვარელი მომვლელები გამოყო და ორი კვირის განმავლობაში აკვირდებოდა მათ, სანამ ისინი ხელოვნურად ამთქნარებდნენ. "კნისნაში მომვლელები გასაოცრად ზუსტად აყალბებდნენ მთქნარებას. თავიდან მათ ეს სასაცილო ეგონათ, მაგრამ მერე სპილოს პირველი დამთქნარება დაინახეს", — ამბობს როსმანი.

მათ 13 ღამის განმავლობში შეისწავლის 10 აფრიკული სპილო და მთქნარების შიდასახეობრივი გადადების 9 შემთხვევა შენიშნეს. ამ 10 სპილოდან 7 ასევე მონაწილეობდა ადამიანებთან მთქნარების ექსპერიმენტში, რომელთაგან სამსაც მომვლელისგან გადაედო მთქნარება. "ეს სპილოებში ნაცნობი ადამიანების მთქნარების სახეობათაშორისი გადადების ოფიციალურად დაფიქსირებული პირველი შემთხვევაა", — დაწერეს კვლევის ავტორებმა.

ვინაიდან სპილოები ძალიან ჭკვიანი და სოციალური ძუძუმწოვრები არიან, გუნდი ამბობს, რომ ლოგიკურია, რომ მათ სხვა ნაცნობი სპილოებისგან მთქნარება გადაედებათ. მიუხედავად ამისა, როსმანს სჯერა, რომ სპილოებსა და მათ მომვლელებს შორის მთქნარების გადადების ეს კავშირი იმის მაუწყებელია, რომ ტყვეობასა თუ ბუნების დაცვის პროექტების ფარგლებში მეთვალყურეობის ქვეშ ყოფნისას სპილოებს სპეციალური მოვლა სჭირდებათ, რათა ის ურთიერთობები შენარჩუნდეს, რომლებსაც ისინი თავიანთ მომვლელებთან წარმოქმნიან.