პრემიერმინისტრის, გიორგი გახარიას განცხადებით, მსუბუქად მიმდინარე შემთხვევებმა და უსიმპტომო პაციენტებმა შესაძლოა სხვადასხვა სივრცეში, მათ შორის სასტუმროებში გააგრძელონ მკურნალობა. როგორც საკოორდინაციო საბჭოს სხდომის შემდეგ გახარიამ თქვა, ეს ექიმების მეთვალყურეობის ქვეშ თბილისში, ბათუმსა და ქუთაისში განხორციელდეს.

"მოგეხსენებათ, ჩვენ გვყავს შექმნილი კლინიკური ჯგუფი, რომელსაც ბატონი თენგიზ ცერცვაძე ხელმძღვანელობს, ამ მიზნის მისაღწევად ჩვენ ვთხოვეთ და ეს ყველაფერი მათი პროტოკოლების მიხედვით განხორციელდება. ასეთი გეგმა გვაქვს", — განაცხადა პრემიერმა.

დაავადებათა კონტროლის ხელმძღვანელის, ამირან გამყრელიძის თქმით, ეს გადაწყვეტილება არ ნიშნავს, რომ უსიმპტომო პაციენტი პირდაპირ ასეთ სივრცეში/სასტუმროში წავა.

"როცა დგინდება და პოზიტიური ლაბორატორიულად ადამიანში რეაქცია, ის ჯერ მიდის საავადმყოფოში. პროტოკოლით პირველი რამდენიმე დღე ყველა გამოკვლევა ჩაუტარდება და კლინიცისტები მიიღებენ გადაწყვეტილებას, მისი საავადმყოფოში დატოვების ან ამბულატორიულ, ანუ სასტუმრო პირობებში მკურნალობასთან დაკავშირებით. როგორც წესი მათ წამალი არ სჭირდებათ, მათ სჭირდებათ კლინიკური მონიტორინგი", — აღნიშნა გამყრელიძემ.

7 სექტემბრის მონაცემებით, საქართველოში კორონავირუსის 34 ახალი შემთხვევა გამოვლინდა, 5 ადამიანი გამოჯანმრთელდა. მონაცემები StopCov-ზე განახლდა.

ინფექციური საავადმყოფოს სამედიცინო დირექტორის, მარინა ეზუგბაიას თქმით, 34 დადასტურებული შემთხვევის განაწილება შემდეგნაირია — 6 შემთხვევა საკონდიტრო დონას კლასტერიდანაა, 15 პაციენტის წყარო დადასტურებულ შემთხვევებთან კონტაქტია, 8 პაციენტს აჭარაში მოგზაურობის ისტორია აქვს, 1 დადასტურებული შემთხვევა სამედიცინო პერსონალია, 2 კი შემოტანილი შემთხვევაა. დარჩენილ 2 პაციენტზე წყაროს დადგენისა და კონტაქტების მოძიების თვალსაზრისით ეპიდემიოლოგიური კვლევა გრძელდება.

ჯამში, საქართველოში კორონავირუსის დადასტურებულ შემთხვევათა რაოდენობა 1 684-მდე გაიზარდა, ამათგან 1 315 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 6 020, სტაციონარში მეთვალყურეობის ქვეშ კი — 299.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: