ევროპული საქართველოს მაჟორიტარი დეპუტატობის კანდიდატი აჭარის უმაღლეს საბჭოში, ვახტანგ კალოიანი, საქართველოს მთავრობას კორონა ვირუსის პრევენციის მიზნით დამატებითი ნაბიჯების გადადგომისაკენ მოუწოდებს.

ვახტანგ კალოიანის თქმით, საქართველოს მთავრობამ უნდა ჩაუტაროს ტესტირება ყველა სარისკო ობიექტის პერსონალს, რათა მაქსიმალურად იყოს თავიდან აცილებული ვირუსის გავრცელება. კალოიანმა აღნიშნა, რომ მსგავსი აფეთქებები, როგორიც ბათუმში იყო, სახიფათოა ჯანდაცვის სისტემისათვის.

"მოვუწოდებთ ხელისუფლებას მაქსიმალურად აქტიური იყოს კვლევებთან დაკავშირებით, ყველა სარისკო ობიექტის პერსონალს გაუკეთდეს ტესტირება დროულად, მანამ სანამ იქნება აფეთქეები. ეს იქნება სასტუმროები, მცირე კაფეები, რესტორნები. ეს თავიდან აგვაცილებს ძალიან ბევრ გაუგებრობას და მსგავს უსიამოვნო აფეთქებებს, რაც შეიძლება საკმაოდ სახიფათო იყოს ჩვენი ჯანდაცვის სისტემისთვის", — განაცხადა ვახტანგ კალოიანმა.

ვახტანგ კალოიანმა და პარტიის რაიონული ორგანიზაციის წევრებმა ბათუმის ბულვარში განთავსებულ საველე კარავში პისიარ ტესტირებაც ჩაიტარეს. ვახტანგ კალოიანის თქმით, ეს მაქსიმალურად დაცულს გახდის საარჩევნო პერიოდს, რადგან მას და პარტიის წევრებს ბევრ ადამიანთან უხდებათ შეხვედრა.