აშშ-მ სისხლის სამართლის საერთაშორისო სასამართლოს (ICC) მაღალჩინოსნების, მათ შორის მთავარი პროკურორის ფატუ ბენსუდას მიმართ ეკონომიკური სანქციები გაატარა. ICC გატარებულ სანქციებს გმობს.

სწორედ პროკურორი ფატუ ბენსუდა იძიებს 2008 წლის აგვისტოს ომში სამხედრო დანაშაულს. იგი საქართველოში არაერთხელ იყო ჩამოსული.

ICC-ში აცხადებენ, რომ აღნიშნული სანქციები უპრეცენდენტოა და თავის მხრივ წარმოადგენს სერიოზულ თავდასხმას სასამართლოზე, სისხლის სამართლის საერთაშორისო სისტემასა და, ზოგადად, კანონის უზენაესობაზე.

ჰააგაში დაფუძნებულმა სისხლის სამართლის საერთაშორისო სასამართლომ ავღანეთში აშშ-სა და სხვა ქვეყნების სავარაუდო სამხედრო დანაშაულის გამოძიება ამ წლის დასაწყისში დაიწყო. აშშ სასამართლოს დაფუძნებისთანავე აკრიტიკებდა და ერთ-ერთია იმ ათეულობით ქვეყანას შორის, რომელიც მისი ხელმომწერი არაა. მიუხედავად იმისა, რომ ავღანეთი სასამართლოს წევრია, გამოძიების დაწყებას ისინიც არ ეთანხმებიან.

ICC-ის 2016 წლის ანგარიშში წერია, რომ არსებობს ეჭვები იმასთან დაკავშირებით, რომ ამერიკელი სამხედროები საიდუმლო ადგილებში, რომელსაც ცენტრალური სადაზვერვო სამსახური ხელმძღვანელობდა, წამების მეთოდებს იყენებდნენ.

აშშ-ს პრეზიდენტმა, დონალდ ტრამპმა ივნისში გამოსცა ბრძანება, რომელიც საშუალებას იძლევა ICC-ს თანამშრომლებს ქვეყანაში შესვლა აეკრძალოთ, ასევე, მათი ანგარიშები გაიყინოს.

სახელმწიფო მდივანმა, მაიკ პომპეომ ICC თავის იურისდიქციაში აშშ-ს მოქცევის უკანონო ქმედებაში დაადანაშაულა. სწორედ ამ ბრძანების საფუძველზე გატარდა სანქციები.

აშშ-ს სახელმწიფო დეპარტამენტმა შეუზღუდა ვიზების გაცემა იმ პირებზე, რომლებიც ავღანეთის გამოძიებაში მონაწილეობდნენ.

გამოსვლის დროს მაიკ პომპეომ ICC-ის "შერყეული და კორუმპირებული" უწოდა და განაცხადა, რომ სანქციების რისკის ქვეშ არიან ისინიც, ვინც მატერიალურად უზრუნველყოფენ ICC-ის მაღალჩინოსნებს. ამასთან, მან პირობა დადო, რომ ამერიკელებს გამოძიებისგან დაიცვას.