ბელარუსის პრეზიდენტმა, ალექსანდრ ლუკაშენკომ 24 სექტემბრის ბრძანებით 15 პატიმარი შეიწყალა. ეს გადაწყვეტილება აშშ-ის პრეზიდენტ დონალდ ტრამპის სპეციალურ წარმომადგენელთან გასულ კვირას გამართულ მოლაპარაკებებს მოჰყვა. ინფორმაციას Reuters ავრცელებს.

ტრამპის წარმომადგენელი ჯონ კოული ლუკაშენკოსთან უკვე ერთ წელზე მეტია აწარმოებს მოლაპარაკებებს. ამ დროისთვის მან ასობით პატიმრის, მათ შორის ოპოზიციონერების, აქტივისტების, ჟურნალისტებისა და იურისტების გათავისუფლება შეძლო, რის სანაცვლოდაც აშშ-მა გარკვეული სანქციები მოხსნა.

უფლებადამცველი ორგანიზაცია "ვიასნას" ცნობით, ბელარუსში კვლავ 883 პოლიტიკური პატიმარი რჩება, რომლებიც ისეთი ბრალდებებით არიან მსჯავრდებულები, როგორიცაა ექსტრემისტული საქმიანობა, სიძულვილის გაღვივება ან პრეზიდენტის შეურაცხყოფა.

ლუკაშენკოს ოფისის განცხადებით, ახლად შეწყალებულ 15 ადამიანს შორის 10 ქალია, მათგან 13-მა კი "ექსტრემისტული ხასიათის დანაშაული ჩაიდინა". უწყების ცნობით, შეწყალება მას შემდეგ მოხდა, რაც მსჯავრდებულებმა შეწყალება ითხოვეს და სინანული გამოთქვეს.