გენერალ-ლეიტენანტი, ევროპაში აშშ-ის სამხედრო ძალების ყოფილი ხელმძღვანელი ბენ ჰოჯესი გამოცემა The Hill-ში საქართველოს შესახებ კრიტიკულ სტატიას აქვეყნებს და ამბობს, რომ ქვეყანა არასწორი მიმართულებით მიდის. ამის მაგალითად მას, ანაკლიის ღრმაწყლოვანი პორტის პროექტის ჩაგდებასთან ერთად, კომუნიკაციების სექტორში ახალ რეგულაციების საკითხი მოჰყავს და აცხადებს, რომ საქართველოს მთავრობის ქმედებებით მხოლოდ რუსეთის სარგებლობს. ის საქართველოსთან ერთად ბელარუსის მთავრობასაც აკრიტიკებს.

"ბელარუსი და საქართველო შიშისმომგვრელი შეხსენებაა იმისა, თუ რა შეიძლება მოყვეს უსაფრთხოების ვაკუუმის შექმნას და ეს მაშინ, როცა რუსეთის ჩარევისთვისაც კარს ღიას ტოვებ. ამერიკის შეერთებულმა შტატებმა და ევროკავშირმა საქართველოს ყურადღებით უნდა ადევნონ თვალი. მიუხედავად ევროკავშირსა და ნატოში გაწევრიანების მხარდაჭერისა საზოგადოების მხრიდან, ორივე ქვეყნის მთავრობა დასავლურ სტრუქტურებში გასაწევრიანებლად არასწორ გზას ადგას", — წერს ჰოჯესი.

მისივე თქმით, საქართველოს სტატისტიკის ეროვნული სამსახურის (საქსტატი) მონაცემებით, საქართველოში უცხოური პირდაპირი ინვესტიციების მოცულობა 2017 წლიდან 40%-ით შემცირდა და ამაში ქვეყანამ მხოლოდ საკუთარი თავი უნდა დაიდანაშაულოს.

ის, აგრეთვე, აცხადებს, რომ საქართველოს ხელისუფლებამ უცხოელი ინვესტორები გაუგებარი მიზეზით გააძევა ქვეყნიდან. ამის მაგალითად მას, ანაკლიის ღრმაწყლოვანი პორტის პროექტი მოჰყავს. გენერალი ანაკლიის პორტის მნიშვნელობას უსვამს ხაზს და აღნიშნავს, რომ საბოლოო ჯამში პორტის არსებობა რუსეთის მიერ ოკუპირებული აფხაზეთისა და ე.წ. სამხრეთ ოსეთის საკითხისთვის უფრო მეტი ყურადღების მიპყრობის შესაძლებლობა იყო. მაგრამ, მისივე თქმით —"ეს არ არის რუსეთის ინტერესებში, ამიტომ იმუშავა კრემლმა ამდენი, რომ ჩაეგდო ანაკლიის პორტის პროექტი".

ჰოჯესი, კომუნიკაციების სექტორში ახალ რეგულაციებზეც საუბრობს და აღნიშნავს, რომ შეტანილ ცვლილებებს საქართველოს საინვესტიციო კლიმატის დაზიანების პოტენციალი აქვს. მისივე თქმით, ახალი კანონი Caucasus Online-ს აბრკოლებს, შექმნას ახალი ოპტიკური ინფრასტრუქტურა, რომელიც ევროპასა და ცენტრალურ აზიას დააკავშირებს. მან კომუნიკაციების მარეგულირებელ კომისიას მოუწოდა პატივი სცეს საქართველოს ციფრულ დამოუკიდებლობას რუსეთისაგან.

საუბარია, 17 ივლისს საქართველოს პარლამენტის მიერ ელექტრონული კომუნიკაციების შესახებ კანონში შეტანილ სადავო ცვლილებებზე, რომელიც ავტორიზებულ/ლიცენზიის მფლობელი პირისთვის სპეციალური მმართველის დანიშვნას ითვალისწინებს. კანონპროექტის განხილვა დაჩქარებული წესით, ხმაურიანი საკომიტეტო მოსმენების ფონზე მიმდინარეობდა. ცვლილებებს და მის დაჩქარებულ განხილვას ოპოზიცია, კომუნიკაციების სფეროს წარმომადგენლები და არასამთავრობო ორგანიზაციები არ ეთანხმებოდნენ.

ამავე სტატიაში ჰოჯესი სამხედრო და დიპლომატიურ თანამშრომლობასთან ერთად კერძო ინვესტიციების მნიშვნელობასაც უსვამს ხაზს, რომელიც, მისივე თქმით, ქვეყნის უსაფრთხოებისა და სტაბილურობის მშენებლობისთვის აუცილებელია. ამიტომ ის მთავრობას ინვესტიციებისთვის მიმზიდველი პირობების შექმნას ურჩევს.