ბერლინის საერთაშორისო კინოფესტივალის დირექტორების — მარიეტე რისენბეკის და კარლო შატრიანის — გადაწყვეტილებით, 2021 წლიდან ყოველწლიურ ღონისძიებაში მნიშვნელოვანი ცვლილება შევა: ვერცხლის დათვის სამსახიობო ნომინაციები გენდერულად ნეიტრალური იქნება.

"ნაცვლად საუკეთესო მსახიობი კაცის და საუკეთესო მსახიობი ქალის პრიზისა, წარმოდგენილი იქნება 'ვერცხლის დათვი საუკეთესო მთავარი როლის შესრულებისთვის' და 'ვერცხლის დათვი საუკეთესო მეორეხარისხოვანი როლის შესრულებისთვის'. ორივე მათგანი გენდერულად ნეიტრალური ნომინაცია იქნება", — ნათქვამია ფესტივალის განცხადებაში.

ფოტო: SCANPIX

ვერცხლის დათვის პრიზი საუკეთესო მსახიობი კაცისა და საუკეთესო მსახიობი ქალისათვის 1956 წლიდან გაიცემა. ნომინაციების ბოლო პრიზიორები ელიო ჯერმანო (ფილმისთვის Hidden Away) და პოლა ბიერი (ფილმისთვის Undine) არიან 2020 წლის ფესტივალიდან.

"ჩვენ გვჯერა, რომ სამსახიობო სფეროში გენდერულად ნეიტრალური ნომინაციების წარდგენა ერთგვარი შეტყობინებაა, რომ კინოინდუსტრიაში ასეთ სენსიტიურ საკითხებზე ცნობიერება ამაღლდეს", — ამბობენ ფესტივალის დირექტორები განცხადებაში.

ამ განცხადებით ბერლინალე პირველი მნიშვნელოვანი საერთაშორისო კინოფესტივალი ხდება, რომელიც ნომინაციების სქესზე დაყრდნობით ტრადიციულად გაცემის წესს ცვლის. სხვა კინოფესტივალებზე, როგორებიცაა კანის ან ვენეციის საერთაშორისო ფესტივალები, კვლავ გაიცემა პრიზები საუკეთესო მსახიობი კაცისა და საუკეთესო მსახიობი ქალისათვის.

ბერლინის საერთაშორისო კინოფესტივალის დირექტორები — კარლო შატრიანი და მარიეტე რისენბეკი.

ფოტო: Alexander Becher / EPA-EFE / REX / Shu

ბერლინალეს სამსახიობო ნომინაციების პრიზები სხვადასხვა წლებში მოიპოვეს ტომ კორტნიმ და შარლოტ რემპლინგმა, ფილმისთვის 45 წელი, ბენისიო დელ ტორომ, ფილმისთვის Traffic, პოლინა გარსიამ, ფილმისთვის გლორია, შარლიზ ტერონმა, ფილმისთვის ურჩხული, და სხვა არაერთმა ცნობილმა მსახიობმა.

ამ სიახლესთან ერთად ფესტივალის დირექტორების განცხადებით, მომავალი წლის ღონისძიება ჩვეულ ფორმატში ჩატარდება და არა — ვირტუალურად. ამისდა მიუხედავად, ნაწილობრივ ვირტუალად იგეგმება ევროპული კინობაზრის (EFM) ჩატარება.

"ფესტივალები და ამგვარი ღონისძიებები, როგორც წესი, სწორედ შეხვედრისა და კომუნიკაციისთვისაა", — აცხადებენ რისენბეკი და შატრიანი, — "ეს ეხება როგორც მაყურებელს, ასევე ინდუსტრიის წარმომადგენლებს. ფესტივალების გამორჩეულ მხარე სწორედ მათი ურთიერთობაა მაყურებელთან. კორონავირუსის პანდემიის პერიოდში, ნათელია, რომ ჩვენ გვჭირდება ამ კულტურულ სამყაროში ალტერნატიული სივრცის მოძებნა, სადაც მსგავსი გამოცდილების მიღებას შევძლებთ. გვიხარია, რომ ფესტივალები ნელ-ნელა ჩვეული ფორმატით უბრუნდება მაყურებელს. ჩვენს კოლეგებს კი დიდ წარმატებას ვუსურვებთ", — ნათქვამია განცხადებაში.

2021 წლის ბერლინალეზე საერთაშორისო ჟიური პრიზებს რვა ნომინაციაში გასცემს:

  • ოქროს დათვი საუკეთესო კინონამუშევრისთვის (პრიზი ფილმის პროდიუსერებს)
  • ვერცხლის დათვი საუკეთესო რეჟისურისთვის
  • ვერცხლის დათვი საუკეთესო მთავარი როლისთვის
  • ვერცხლის დათვი საუკეთესო მეორეხარისხოვანი როლისთვის
  • ვერცხლის დათვი საუკეთესო სცენარისთვის
  • ვერცხლის დათვი სამსახიობო ინდუსტრიაში შეტანილი განსაკუთრებული წვლილისთვის
  • ვერცხლის დათვის ჟიურის პრიზი
  • ვერცხლის დათვის ჟიურის პრიზი — გრან პრი

რიგით 71-ე ბერლინის საერთაშორისო კინოფესტივალი 2021 წლის 11 თებერვლიდან 21 თებერვლამდე გაიმართება.