სასამართლომ გიორგი შაქარაშვილის საქმეზე დაცვის მხარის წაყენებული არცერთი მოთხოვნა არ დააკმაყოფილა და 11-ვე ბრალდებულის მიმართ გამოყენებული აღკვეთის ღონისძიება, პატიმრობა, ძალაში დარჩა.

პროკურორი, დავით ყაზარაშვილის განცხადებით, დაცვის მხარის ადვოკატების მიერ დაფიქსირებული პოზიციები რაიმე ახლადგამოვლენილი გარემოებიდან გამომდინარე არ ყოფილა გაკეთებული, შესაბამისად სასამართლომ ძალაში დატოვა თავისივე გადაწყვეტილება.

რაც შეეხება, დაცვის მხარის მიერ წაყენებულ მეორე მოთხოვნას მოსამართლე კულუაშვილის აცილების თობაზე, პროკურორის თქმით, არგუმენტაციის არარსებობის გამო არც ეს მოთხოვნა დაკმაყოფილდა.

"ფაქტობრივად ყველა მოსამართლის წინაშე დაცვის კონკრეტული წარმომადგენელი აყენებს აცილების შუამდგომლობას. ყველა პროცესზე მოვისმინეთ ასეთი შუამდგომლობები, თუმცა ყველა ეს შუამდგომლობა მსგავსი იყო, ვინაიდან არცერთი არ იყო დასაბუთებული კონკრეტულ არგუმენტებზე და ზოგადად აბსტრაქტულ გარემოებებზე დაყრდნობით აცხადებდნენ, რომ მოსამართლეს არ უნდა მიეღო საქმის განხილვაში მონაწილეობა", — აცხადებს პროკურორი.

არჩილ გაგნიძის ადვოკატი, ვასილ მამულაშვილის განცხადებით, მოსამართლე კულუაშვილის აცილების შესახებ არსებობდა საპროცესო საფუძველი, რისი დაკმაყოფილებაც უფრო მეტ ნდობასა და ლეგიტიმაციას მიანიჭებდა სასამართლოს.

"მან თვითონაც დაადასტურა, რომ 12 აგვისტოდან არის აღნიშნულ სასამართლოში მოვლენილი იმის გამო, რომ თითქოს სასამართლოს უჭირს საქმეების განხილვა, თუმცა ეს ამ პერიოდში არ წარმოშობილა და პირიქით ჩვენ გვაქვს ინფორმაცია, რომ არა სისხლის სამართლის კოლეგიას, არამედ სამოქალაქო საქმეთა კოლეგიას უჭირს და შესაბამისად ეს მოსამართლე იყო სწორედ იმიტომ მოვლენილი, რომ განიხილოს მათ შორის აღნიშნული საკითხები. შესაბამისად, ეს ეჭვს აჩენდა და ყოველგვარი ეჭვი მის ობიექტურობასა და მიკერძოებულობასთან დაკავშირებით იძლევა აცილების საფუძველს", — აცხადებს არჩილ გაგნიძის ადვოკატი.

შაქრაშვილის საქმეზე ბრალდებული 11 სრულწლოვანი პირის საქმე ცალკე წარმოებად არის გამოყოფილი. ბრალდებულებს: ვახტანგ ჩიქოვანს, ვასილ მახარაძეს, არჩილ გაგნიძეს, ნიკა რევაზიშვილს, გიგა ტატიაშვილს, თენგიზ ბარბაქაძეს, ნიკა ჟვანიას, ირაკლი მუმლაძეს, საბა ჩხარტიშვილს, ირაკლი წაქაძესა და საბა გოგშელიძეს გამოძიება ედავება ჯგუფური ძალადობის ორგანიზებას, მასში მონაწილეობასა და თავისუფლების უკანონო აღკვეთას.

მათგანს სამს — ვახტანგ ჩიქოვანს, ნიკა რევაზიშვილსა და არჩილ გაგნიძეს, ასევე, 2 არასრულწლოვანს ბრალდებულს ზ.ხ.-სა და ა.ქ.-ს 11 აგვისტოს პროკურატურამ ბრალი დაუმძიმა. გამოძიება მათ დამამძიმებელ გარემოებებში ჩადენილ განზრახ მკვლელობას ედავება. პროკურატურის ვერსიით, მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.