ირაკლი კობახიძემ საქართველოს საარჩევნო პროცესებში რუსეთის საგარეო ჩარევის შესახებ საფრანგეთის პრეზიდენტის, ემანუელ მაკრონის განცხადებას უპასუხა. კობახიძის თქმით, მაკრონმა უკრაინას უნდა მიხედოს, რომელიც "განადგურებისთვის გაწირა".

"საფრანგეთის პრეზიდენტმა მიხედოს უკრაინას, რომელიც გაწირეს განადგურებისთვის. მე ვსაუბრობ იმაზე, რაც არის რეალური პრობლემა. ტყუილებზე ვერ გავაკეთებ კომენტარს. კომენტარს ვაკეთებ იმ პრობლემაზე, რომელიც დგას ყველას წინაშე — ეს არის განადგურებული უკრაინა", — განაცხადა ირაკლი კობახიძემ.

ემანუელ მაკრონმა გუშინ, 6 იანვარს, საფრანგეთის ელჩების კონფერენციაზე ისაუბრა რუსეთის აგრესიულ ქცევაზე სომხეთის, საქართველოსა და მოლდოვსთან მიმართებაში:

"ჩვენ ეს ვნახეთ სომხეთში, სადაც რუსეთი მოულოდნელად აზერბაიჯანის მოკავშირე გახდა, მხოლოდ იმიტომ, რომ სომხები მას წინ აღუდგნენ. ასევე — საქართველოში, საარჩევნო პროცესის დესტაბილიზაციის გზით, ბიულეტენების ყუთებში ჩაყრით. იგივე სცადეს მოლდოვაშიც, მაგრამ არ გამოუვიდათ", — განაცხადა მაკრონმა.