ალექსანდრ ლუკაშენკომ ბელარუსულ მედია BELTA-სთან საუბარში ვოლოდიმირ ზელენსკისა და უკრაინაზე ისაუბრა. ლუკაშენკომ უკრაინის პრეზიდენტი გააკრიტიკა და განაცხადა, რომ უკეთესია ბელარუსის მსგავსი დიქტატურა, ვიდრე უკრაინის მსგავსი დემოკრატია.

"რატომ იქცევა ვოლოდია ზელენსკი ასე? ჩვენ კარგად ვიყავით მასთან, კარგ ურთიერთობაში. რაებს ჩმახავს? რა აკლია? ისინი მას ბრძანებას აძლევენ. ყველაფერი უნდა გაკეთდეს იმისათვის, რომ ქვეყანა ომში ჩავითრიოთ. თუ ომში ჩაგვითრევენ, რთული ვითარება იქნება. შეიძლება, როგორც სახელმწიფომ, ვერ გავუძლოთ. ამიტომ ყველაფერს მოთმინებით და დაჟინებით ვაკეთებ, როგორც უფალი და ეკლესია გვასწავლის. მოდით, გავაკეთოთ ჩვენი საქმე. დრო ყველაფერს დაალაგებს. დრო ყველას მისცემს შეფასებას, მაგრამ ჩვენ გვჭირდება მოთმინება. დაე, თქვან, რომ აქ დიქტატურა გვაქვს, ან სხვა რამ. მისმინეთ, ისეთი დიქტატურა, როგორიც ბელარუსშია, უკეთესია, ვიდრე ისეთი დემოკრატია, როგორიც უკრაინაშია", — განაცხადა ლუკაშენკომ.

ბელარუსის ავტორიტარმა მმართველმა დიდი დრო დაუთმო მშვიდობაზე საუბარსაც — მისი თქმით, არ სჭირდება არაფერი, თუ ბელარუსში მშვიდობა არ იქნება.

"ყველაფერი გაკეთდება ბელარუსში მშვიდობის შესანარჩუნებლად. თუ ჩვენ გვექნება მშვიდობა, სხვა ყველაფერს ვიყიდით. შეიძლება მდიდრულად ვერ ვიცხოვროთ, თუმცა წესიერი ცხოვრება გვექნება, როგორც ახლა. ჩვენ არავის არაფერს ვთხოვთ — ვცხოვრობთ იმ ფულით, იმ სახსრებითა და შესაძლებლობებით, რომლების რეალიზებასაც ბელარუსში ვახერხებთ. სწორედ ამიტომ არის მშვიდობის შენარჩუნება ჩვენთვის ყველაზე მნიშვნელოვანი. თუ არ გვექნება მშვიდობა, არ გვჭირდება არაფერი", — აცხადებს ლუკაშენკო.