Meta ასრულებს ფაქტჩეკინგის პროგრამას და Facebook-ზე, Instagram-სა და სხვა პლატფორმებზე "გამოხატვის თავისუფლების აღდგენის" პირობას იძლევა. მარკ ცუკერბერგი დღეს გავრცელებულ ვიდეოში ამბობს, რომ ქსელების კონტენტის მოდერაციის პრაქტიკები გასცდა დასაშვებ ზღვარს. დამატებით, ცუკერბერგი გადაწყვეტილებას შეცდომების შემცირების მიზეზით ხსნის და ამბობს, რომ პოლიტიკის გამარტივება სასიკეთო ცვლილება იქნება.

"ჩვენ ჩვენს ფესვებს ვუბრუნდებით და შეცდომების შემცირებაზე ვფოკუსირდებით, გავამარტივებთ რა პოლიტიკას და დავაბრუნებთ გამოხატვის თავისუფლებას ჩვენს პლატფორმებზე. უფრო კონკრეტულად, ფაქტჩეკერებს ჩავანაცვლებთ საზოგადოების შენიშვნების (Community Note) სისტემით, როგორიც X-ზე გვხვდება", — განაცხადა Meta-ს აღმასრულებელმა დირექტორმა მარკ ცუკერბერგმა.

ცვლილებები ძალაში შედის 2 კვირით ადრე ამერიკის შეერთებული შტატების არჩეული პრეზიდენტის, დონალდ ტრამპის ინაუგურაციამდე — ტრამპი და სხვა რესპუბლიკელები ცუკერბერგსა და მეტას ხშირად აკრიტიკებდნენ "მემარჯვენე ხმების ცენზურისთვის".

"ფაქტჩეკერები პოლიტიკურად მიკერძოებულები იყვნენ და ნდობა უფრო მეტად დაანგრიეს, ვიდრე შექმნეს. ის, რაც ინკლუზიურობის უზრუნველსაყოფად შეიქმნა, თანდათან გადაიქცა აზრებისა და განსხვავებული იდეების მქონე ადამიანების გაჩუმების ინსტრუმენტად", — განაცხადა ცუკერბერგმა.

მიუხედავად ამისა, ცუკერბერგმა აღიარა, რომ ახალი პოლიტიკის ფარგლებში, მოდერაციის ცვლილებების გამო, პლატფონმებზე, სავარაუდოდ, მეტი მავნე კონტენტი გამოჩნდება.

ინფორმაციისთვის, დამოუკიდებელი ფაქტჩეკინგის სისტემა Facebook-ზე 2016 წელს გამოჩნდა და წლების განმავლობაში ებრძოდა პლატფორმაზე წინააღმდეგობრივი კონტენტის გავრცელებას, როგორიცაა ვაქცინაციის საწინააღმდეგო პოსტები, პოლიტიკური დეზინფორმაციები, ძალადობა და სიძულვილის ენა.

ამისათვის კომპანიამ შექმნა უსაფრთხოების გუნდები, ავტომატიზებული პროგრამები, რათა წარმატებით გაეფილტრა მსგავსი შინაარსის მასალა. თუმცა, ახლა ცუკერბერგი ილონ მასკის გზას მიჰყვება, რომელმაც 2022 წელს X-ის (ყოფილი Twitter) შეძენის შემდეგ დაშალა კომპანიის ფაქტჩეკინგის გუნდი და სოციალურ ქსელში Community Notes სისტემა ჩააშენა, რაც X-ზე დღესდღეობით ინფორმაციის სანდოობის გადამოწმების ერთადერთი საშუალებაა.