ბელარუსიიდან რადიო თავისუფლების რუსული ბიუროს ჟურნალისტების გამოაძევეს და ამავე მედიის ადგილობრივი ვებგვერდი დაბლოკეს. მედიასაშუალების ინფორმაციით, ჟურნალისტების იულია ვიშნევეცკაია და ანდრეი კისილიოვი პარასკევს მინსკში სამსახურებრივი მოვალეობის შესრულებისას დააკავეს და ქვეყნის 25 აგვისტომდე დატოვობა მოსთხოვეს.

რადიო თავისუფლების ინფორმაცით, ბელარუსში ჩასვლამდე, ჟურნალისტებმა მიიღეს ოფიციალური აკრედიტაცია საგარეო საქმეთა სამინისტროსგან, ამიტომ დეპორტაციას უკანონოდ მიიჩნევენ.

რადიო თავისუფლების ევროპის ბიუროს პრეზიდენტის მოვალეობის შემსრულებელი, დეიზი სინდელარი აცხადებს, რომ მინსკში ყველანაირად აბრკოლებენ რუსეთიდან და უკრაინიდან შემავალი ჟურნალისტებისთვის აკრედიტაციის გაცემის საკითხს, რაც აძლევს მთავრობას "ცინიკურ მიზეზს", რომ გასაშუქებლად ჩასული ჟურნალისტები გამოაძევოს. სინდელარი მიიჩნევს, რომ ეს არის მცდელობა ხელი შეუშალონ მედიას "დასუსტებული დიქტატორის" რეჟიმი და მიმდინარე მოვლენები გააშუქონ.

ბელარუსში 70-ზე მეტი ვებგვერდი დაბლოკეს. მათ შორისაა, როგორც ადგილობრივი, ასევე, საერთაშორისო მედიები, რომლებიც აქტიურად აშუქებდნენ საპროტესტო აქციებს.

გამოცემა TUT.BY წერს, რომ აღნიშნული ვებგვერდები ბელარუსიის ინფორმაციის სამინისტროს "შავ სიაში" მოხვდნენ. მათივე ინფორმაციით, ვებგვერდებზე შესვლისას ეწერება:

"აღნიშნულ ვებგვერდზე წვდომა შეზღუდულია ბელარუსიის ინფორმაციის სამინისტროს გადაწყვეტილებით, რომელიც მიღებულია მასობრივი ინფორმაციის საშუალებების შესახებ კანონზე დაყრდნობით".

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.