HBO-მ ჰარი პოტერის პირველი სეზონის ახალი ტრეილერი გამოუშვა, რომელშიც უფრო დეტალურად ჩანს სერიალის სამსახიობო შემადგენლობა და ჰარის პირველი წელი ჰოგვორტსში.

ტრეილერში როულინგის პირველი წიგნის ბევრ სამახსოვრო მომენტს ვხედავთ — ჰარი, რომელიც გამანაწილებელ ქუდს სთხოვს, სლიზერინში არ მოახვედროს, ქვიდიჩის უზარმაზარი მოედანი და ჰერმიონი ჩვეულ ამპლუაში — საყვედურობს პოტერსა და უიზლის, რომლებიც წიგნებს არ კითხულობენ.

ფოტო: HB

ერთ-ერთი საინტერესო ხაზი, რომელსაც ტრეილერში ვხედავთ, ისაა, თუ როგორ ცდილობს ჰარი, სკოლაში ჩვეულებრივი მოსწავლე იყოს. ბიჭს პროფესორი მაკგონაგელი ურჩევს, რომ ბევრი იშრომოს და იპოვოს ის, რაც ნამდვილად გაიტაცებს. შემდეგ კი ვხედავთ ჰარის, რომელიც შელოცვებს არასწორად წარმოთქვამს და გაკვეთილებზე წვალობს.

ქვიდიჩის მონაკვეთი ტრეილერის ყველაზე იმედისმომცემი ნაწილია. ვხედავთ, როგორ გამოდიან გრიფინდორისა და სლიზერინის გუნდები მოედანზე, ტრიბუნები კი ხალხითაა გადატენილი. ამ ხალხს შორის რონი და ჰერმიონიც ჩანან, რომლებიც ჰარის გულშემატკივრობენ. ერთ-ერთ კადრში ჰერმიონი ბანერზე გამოსახულ გრიფინდორის ლომს აცოცხლებს — ეს წიგნის იმ სცენის ინტერპრეტაციაა, სადაც ის დინის დახატულ დროშას აჯადოებს.

ფოტო: HBO

ფოტო: HBO

ფოტო: HBO

თუ პროექტი ქვიდიჩს ფილმებზე მეტ ყურადღებას დაუთმობს, სერიალის შექმნა მარტო ამადაც ეღირება.

1:52 წუთზე კი ვხედავთ ორ პერსონაჟს, რომლებიც ხიდს ჯადოსნური ჯოხებით ანათებენ. ეს პერსონაჟები ძალიან ჰგვანან ჯეიმს და ლილი პოტერებს. თუმცა, ჯეიმსისა და ლილის მსახიობების ვინაობა ჯერჯერობით არ არის დადასტურებული.

ფოტო: HBO

სეზონის პირველი თიზერის ნახვის შემდეგ, ფანები სერიალის თითქოს ფერმკრთალი კადრებით უკმაყოფილო დარჩნენ. თუმცა, ახალ ტრეილერში ყველაფერი ბევრად უფრო ცოცხალი და ხარისხიანი ჩანს.

HBO-მ სეზონის ახალი აღწერაც გამოაქვეყნა: "ჰარი პოტერში განსაკუთრებული არაფერია — ყოველ შემთხვევაში, ასე ეუბნება მას დეიდა პეტუნია. მაგრამ, როდესაც ჰოგვორტსის მაგიისა და ჯადოქრობის სკოლიდან საიდუმლოებებით მოცული წერილი მოდის, მაგიის, მეგობრობისა და თავგადასავლების სამყაროს მალული კარი იღება. თუმცა ჰოგვორტსის მომნუსხველი კედლების მიღმა ბნელი საიდუმლოებები იმალება. ჰარიმ საკუთარი შესაძლებლობები ყველაზე ბნელი ჯადოქრის წინააღმდეგ უნდა დაამტკიცოს".

სერიალის დებიუტი 25 დეკემბერს HBO-ზე შედგება.

იხილეთ ტრეილერი: