23 აგვისტოდან შპს "ბლექ სი პეტროლიუმის" ყულევის ნავთობგადამამუშავებელმა საწარმომ სრულად არარუსული ნედლეულის გადამუშავება დაიწყო. მათ მიერ გავრცელებულ განცხადებაში ნათქვამია, რომ "ამით კომპანიამ წარმატებით დაასრულა რუსული ნავთობის ჩანაცვლება".

"30 აგვისტოს, ყულევის პორტში შემოვიდა გემი KRITI LEGEND, რომელმაც BSP-თვის ლიბიური ნედლი ნავთობის პირველი პარტია შემოიტანა — 90 000 ტონამდე ტვირთი 3 ივლისს გაფორმებული გრძელვადიანი ხელშეკრულების ფარგლებშია მოწოდებული.

ამრიგად, ბლექ სი პეტროლიუმის მიერ 1 და 31 ივლისს გაცხადებული ნედლეულის დივერსიფიკაციის გეგმა წარმატებით განხორციელდა", — წერია განცხადებაში.

აღნიშნულს წინ უძღოდა გარდამავალი პერიოდი, ივლისის თვე და აგვისტოს პირველი 3 კვირა, როდესაც საწარმო რუსულთან ერთად ყაზახურ ნედლ ნავთობს გადაამუშავებდა.

23 ივლისს ევროკავშირმა BSP-ის ყულევის ქარხანა სანქციების სიაში შეიყვანა სწორედ რუსული ნედლი ნავთობის გადამუშავებასთან დაკავშირებით. ეს იყო ევროკავშირის მე-21 სანქციური პაკეტის ნაწილი. თუმცა სანქცია მაშინვე არ ამოქმედებულა — შეზღუდვის ძალაში შესვლა ექვსი თვის შემდეგ იყო გათვალისწინებული, იმ პირობით, რომ ქარხანა რუსულ ნავთობს აღარ გადაამუშავებდა.

აგვისტოში BSP-მ დაიწყო ალტერნატიული წყაროების გამოყენება, მათ შორის ლიბიური ნავთობის. 28 აგვისტოს ლიბიური ნედლი ნავთობის პარტიაც მიიღო. კომპანიის ინფორმაციით, ივლისსა და აგვისტოს პირველ სამ კვირაში ჯერ კიდევ რუსულ და ყაზახურ ნავთობს ერთად ამუშავებდა, 23 აგვისტოდან კი რუსული ნავთობი სრულად ჩაანაცვლა.