საჯარო რეესტრმა ჯერ საქართველოს პარტიად რეგისტრაცია დაახარვეზა, შემდეგ კი განაცხადი განხილვის გარეშე დატოვა.

საჯარო რეესტრის ეროვნული სააგენტოს განცხადებით, "სარეგისტრაციოდ წარდგენილი დოკუმენტაცია არ შეესაბამებოდა რეგისტრაციის პირობებს".

ჯერ საქართველოს აღმასრულებელმა მდივანმა, ზურა შარაშენიძემ NEWS.On.ge-თან განმარტა, რას ედავებოდა მათ საჯარო რეესტრი.

შარაშენიძის თქმით, რეესტრმა ორი მიმართულების ხარვეზი გამოავლინა, ერთი ეხება მათ წესდება და მეორე — წარმომადგენლობით ნაწილს. რაც გულისხმობდა იმას, რომ ყრილობაზე დამსწრე 74 პირის მონაცემები არასრულად იყო შევსებული.

რეესტრმა მათ გადაწყვეტილების გასასაჩივრებლად 30-დღიანი ვადა მისცა.

"ამბობენ, წესდებაზე გვაქვს პრობლემაო, ოღონდ არ ამბობენ, რა პრობლემაა. უბრალოდ განაცხადეს, "მივიჩნევთ, რომ პრობლემა არ აღმოიფხვრა და 30-დღიანი ვადა გაქვთ გასასაჩივრებლად"-ო. გადასარევი, აუცილებლად გავასაჩივრებთ. ახლა ჩვენი ამოცანაა, მივიღოთ დასაბუთება — რას დაწერენ ფურცელზე, თეთრზე შავად და ხელს რაზე მოაწერენ. ამ დასაბუთების მიხედვით ვიმსჯელებთ, ჩავატარებთ ტექნიკურ ყრილობას თუ წავალთ სასამართლოში. ძალიან კარგად იციან, ვისი პარტია ვართ და ვინ არის პარტიის თავმჯდომარე," — განაცხადა შარაშენიძემ.

შეგახსენებთ, რომ მიმდინარე წლის 28 ივნისს ყრილობაზე პარტია ჯერ საქართველოს დაფუძნებასა და თავმჯდომარის არჩევას მხარი დაუჭირეს. პარტიის თავმჯდომარედ ვიქტორ ყიფიანი აირჩიეს.

ვიქტორ ყიფიანი წარსულში ქართული ოცნების დამფუძნებლისა და საპატიო თავმჯდომარის, ბიძინა ივანიშვილის ადვოკატი იყო. "რუსული კანონის" ინიციირების შემდეგ, ყიფიანი ბიძინა ივანიშვილის იურიდიულ ინტერესებს აღარ იცავდა. ვიქტორ ყიფიანი კომპანია MKD Law-ის უფროსი პარტნიორი და ანალიტიკური ორგანიზაცია ჯეოქეისის თავმჯდომარეა.