მოსკოვის ვნუკოვოსა და შერემეტიევოს აეროპორტებმა მუშაობა უკვე მეორე ღამეა შეაჩერეს. ეს მას შემდეგ მოხდა, რაც უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის საჰაერო სივრცე სამოქალაქო ავიაციისთვის უსაფრთხო აღარ არის და ავიაკომპანიებს მოუწოდა, ფრენები შეზღუდონ.

"დაწესებულია დროებითი შეზღუდვები საჰაერო ხომალდების მიღებასა და გაფრენაზე“, — განაცხადა რუსეთის ფედერალურმა საჰაერო ტრანსპორტის სააგენტომ (როსავიაციამ) 2 სექტემბერს, ოთხშაბათს.

The Moscow Times-ის ცნობით, წინა ღამეს მოსკოვის სამმა აეროპორტმა შეაჩერა მუშაობა. Flightradar24-ის მონაცემებით, შერემეტიევოში 21 რეისი გაუქმდა, 235 კი დაგვიანდა. ვნუკოვოში გაუქმდა 22, ხოლო დაგვიანდა 94 რეისი.

1-ელ სექტემბერს ზელენსკიმ საკუთარ Telegram-არხზე ავიაკომპანიები და სადაზღვევო კომპანიები გააფრთხილა, რომ რუსეთის შეიარაღებული ძალების მიერ სამოქალაქო ინფრასტრუქტურაზე განხორციელებული დარტყმების საპასუხოდ, უკრაინა რუსეთის ტერიტორიაზე დრონებით შეტევებს გააძლიერებდა.

2 სექტემბერს უკრაინის საგარეო საქმეთა მინისტრმა ანდრეი სიბიგამ განაცხადა, რომ კიევმა ოფიციალურად აცნობა სამოქალაქო ავიაციის საერთაშორისო ორგანიზაციას (ICAO), რომ რუსეთის საჰაერო სივრცე უსაფრთხო არ არის.

ამასთან, უკრაინამ ICAO-ს მიმართა თხოვნით, მოუწოდოს წევრ სახელმწიფოებს, სრულად აკრძალონ სამოქალაქო თვითმფრინავების ფრენები რუსეთის საჰაერო სივრცეში. Reuters-ის ცნობით, რომელიც უკრაინის აღდგენის, ინფრასტრუქტურისა და ტრანსპორტის მინისტრის, ნიკოლაი კალაშნიკის წერილს ეყრდნობა, კიევი მიიჩნევს, რომ აუცილებელია შესაძლო ტრაგედიების რისკის მინიმუმამდე დაყვანა და ICAO-ს ფრენების აკრძალვის ხელშეწყობას სთხოვს.

ამ განცხადებების საპასუხოდ, როსავიაციამ NOTAM (ავიაციისთვის ოფიციალურ ოპერატიულ შეტყობინება) გამოაქვეყნა და განაცხადა, რომ რუსეთის საჰაერო სივრცესთან დაკავშირებით უკრაინის მიერ გამოქვეყნებულ ყველა დოკუმენტს იურიდიული ძალა არ აქვს და ისინი საერთაშორისო სამოქალაქო ავიაციის შესახებ კონვენციას არღვევს. უწყებამ უკრაინის საავიაციო ხელისუფლება ქვეყნის ხელმძღვანელობის მხრიდან "ტერორისტული რიტორიკის" მხარდაჭერაში დაადანაშაულა.

მიუხედავად ამისა, როსავიაციამ განაცხადა, რომ რუსეთის საჰაერო სივრცის უსაფრთხოდ გამოყენებისთვის დამატებით ზომებს მიიღებს, მათ შორის სატრანსპორტო ინფრასტრუქტურის ობიექტების დაცვას გააძლიერებს.

"რუსეთის საჰაერო ტრანსპორტი და მისი სახმელეთო ინფრასტრუქტურა გეგმურ რეჟიმში აგრძელებს მუშაობას, იღებს და აგზავნის რეისებს, მათ შორის უცხოური ავიაკომპანიების რეისებსაც", — ნათქვამია უწყების განცხადებაში.