რაგბის კავშირის პრეზიდენტობის მოვალეობის შემსრულებელმა, გიორგი გორგასლიძემ თანამდებობა დატოვა. მის ამ გადაწყვეტილებას წინ უძღოდა რაგბის კლუბთა საინიციატვიო ჯგუფის მიერ გამართული ბრიფინგი, სადაც სპორტსმენებმა კლუბებში არსებულ ფინანსურ კრიზისზე ისაუბრეს.

მათი მთავარი მოთხოვნა კორონავირუსის პირობებში ანტიკრიზისული საბჭოს შექმნაა, სადაც კლუბების სამი წარმომადგენელი იქნება — ადამიანები, რომლებიც კლუბების საჭიროებებს კარგად იცნობენ.

საინიციატივო ჯგუფის წევრ გიორგი ზაბახიძის თქმით, პრობლემების მოგვარებას თვეების განმავლობაში უშედეგოდ ცდილობენ. თუმცა მან ასევე აღნიშნა, რომ შექმნილ კრიზისულ სიტუაციაში პასუხისმგებლობა არა მხოლოდ რაგბის კავშირის პრეზიდენტს, არამედ მთელ მის გუნდს ეკისრება.

"პანდემიის გამო კლუბები გაჩერებულები ვიყავით და ისედაც მწირი ფინანსური შესაძლებლობები უარეს დღეში აღმოჩნდა. ამ სიტუაციის შესაცვლელად დავიწყეთ მოძრაობა, რომ მიგვეღო პასუხი რაგბის კავშირის ოფიციალური პირისგან. ვითხოვდით, გადაწყვეტილების მიღებას ანტიკრიზისული საბჭოს შექმნის თაობაზე. სამინისტროდან წამოვიდა ასეთი დირექტივა, რომ უნდა შექმნილიყო ანტიკრიზისული საბჭო, სადაც უნდა ყოფილიყო კლუბების 3 წარმომადგენელი. ეს საბჭო უნდა ყოფილიყო მმართველი ორგანო, სანამ მოვიდოდა საპრეზიდენტო არჩევნები, რომელიც 2020 წლის დეკემბერშია ჩანიშნული. საბჭოს შექმნასთან დაკავშირებით მოვალეობის შემსრულებელი გვიწევდა წინააღმდეგობას, არ ქმნიდნენ საბჭოს", — განაცხადა ზაბახიძემ.

ბრიფინგზე უნდობლობა გამოუცხადეს პრეზიდენტის მოვალეობის შემსრულებელსა და მისი გუნდის ყველა წევრს. გიორგი ზაბახიძის განცხადებით, ჩემპიონატების ჩატარების თარიღი მოახლოვდა, მაგრამ კლუბებს შესაბამისი რესურსი არ გააჩნიათ. მისივე თქმით, ეს არ არის მხოლოდ პანდემიის გამო შექმნილი კრიზისი და ეს არის 2019 წლიდან გადმოყოლილი ვალები.

გიორგი გორგასლიძე რაგბის კავშირის პრეზიდენტის მოვალეობის შემსრულებელი ათი დღის წინ გახდა, მას შემდეგ, რაც თანამდებობა პრეიზდენტმა, გოჩა სვანიძემ დატოვა. თანამდებობაზე ყოფნიდან ათ დღეში, რაგბის კლუბების მიერ გამართული ბრიფინგის შემდეგ, გორგასლიძეც გადადგა.

On.ge-მ გიორგი გორგასლიძესთან დაკავშირება სცადა, მაგრამ მას ტელეფონი გამორთული აქვს.