მედიის წარმომადგენლებმა პარლამენტთან ბათუმელებისა და ნეტგაზეთის დამფუძნებლის, მზია ამაღლობელის მხარდამჭერი აქცია გამართეს.

აქციის მონაწილეებმა გააპროტესტეს უკანონო პატიმრობა, რომელშიც მზია ამაღლობელი იმყოფება. ასევე, სააპელაციო სასამართლოს გადაწყვეტილება, რომელმაც აღმკვეთი ღონისძიების შეცვლის შესახებ სარჩელი წარმოებაში არ მიიღო. მოგვიანებით აქციის მონაწილეებმა უზენაესი სასამართლოსკენ გადაინაცვლეს.

შეგახსენებთ, რომ მზია ამაღლობელი პოლიციამ 11 იანვარს ორჯერ დააკავა. პირველად საპროტესტო შინაარსის პლაკატის გაკვრის გამო, მეორედ კი ბათუმის პოლიციის უფროს ირაკლი დგებუაძისთვის სილის გაწვნისთვის პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე. დაცვის მხარე მზად იყო, გირაოს სახით უზრუნველეყო 100 000 ლარის ღირებულების უძრავი ქონების მობილიზება. წინასასამართლო სხდომის თარიღად 4 მარტი, 11:00 საათი განისაზღვრა.