რამდენიმეთვიანი ლოდინის შემდეგ, გუშინ მსოფლიოს ერთ-ერთი ყველაზე მნიშვნელოვანი პოლიტიკური მოვლენის მომსწრეები გავხდით — დონალდ ტრამპის რიგით მეორე ინაუგურაცია ვაშინგტონში, კაპიტოლიუმის შენობაში შედგა.

ამ ისტორიულ ინაუგურაციას საქართველოში მიმდინარე პოლიტიკური პროცესების ფონზეც განსაკუთრებული ინტერესით ვუყურებდით. ინაუგურაციაზე რესპუბლიკელი სენატორისა და არჩეული კონგრესმენის, ჯო უილსონის მიწვევით სალომე ზურაბიშვილიც იმყოფებოდა, რომელსაც SITUATIONIST-ის დიზაინით შექმნილი, საქართველოს დროშის ხასხასა წითელი ფერის ტანსაცმელი ემოსა.

თუმცა, შოუს მთავარი პერსონაჟი ჩემთვის ამერიკის პირველი ლედი (აწ უკვე მეორედ), მელანია ტრამპი იყო. აღსანიშნავია, რომ მელანიამ 2017 წელს ჩატარებულ ინაუგურაციაზე მორგებული ლუქისგან რადიკალურად განსხვავებული ჩაცმულობა შეარჩია.

2017 წელს მას რალფ ლორენის დიზაინით შექმნილი ღია ცისფერი კაბა და ფეხსაცმელი ემოსა. მოდის კრიტიკოსების თქმით, ეს კოსტიუმი და სწორედ ეს ფერი მაშინდელი მოვლენების კონტექსტში მელანიას მხრიდან ძალიან ჭკვიანურად იყო შერჩეული რამდენიმე მიზეზის გამო.

პირველ რიგში, კაბის სტრუქტურირებული ფორმა და გამოკვეთილი შტრიხები დაკვირვებულ თვალს მაშინვე ახსენებდა ჟაკლინ კენედის, ამერიკის ყველაზე ცნობილი პირველი ლედის სტილს. ამერიკელი დიზაინერის მიერ შექმნილი ტრადიციული სამოსით მელანია ტრამპმა თავის გარდაქმნილ იდენტობას და სპორტული მოდელობის შემდეგ მორგებულ ახალ სტილს, დახვეწილ კლასიკურ ელეგანტურობას გაუსვა ხაზი, ნაზი ცისფრით კი, რომელიც ფერთა ფსიქოლოგიაში სიმშვიდესთან, გაწონასწორებულობასთან და დიპლომატიურობასთანაა ასოცირებული, შესაძლოა პირველ ლედის მაშინდელი დაძაბული პოლიტიკური სურათის ფონზე აშშ-ს მოსახლეობის მოსალოდნელ სტაბილურობაში დარწმუნება სურდა.

დონალდ ტრამპის პირველი პრეზიდენტობის დროს მელანია მედიისა და ამერიკელი საზოგადოების მხრიდან არაერთხელ გამხდარა ბულინგისა და დამცირების მსხვერპლი. მას არასდროს აღიქვამდნენ სერიოზულ ინდივიდად, ხუმრობდნენ მის აქცენტზე, მის წარსულზე. ვინაიდან ტრამპი კონტროვერსული პოლიტიკოსია და ჰილარი კლინტონთან საპრეზიდენტო რბოლისას (და არამარტო) უამრავი სექსისტური, ჰომოფობიური თუ რასისტული კომენტარი გააკეთა და არც მისი ფონი იძლეოდა დადებითი მოლოდინის შექმნის საფუძველს, საზოგადოებაში მისდამი გამეფებული ანტიპათია მელანიაზეც გავრცელდა. დიზაინერები უარს ამბობდნენ მის შემოსვაზე. ამერიკულმა Vogue-მა პირველი ლედი ყდაზე არ დაბეჭდა, რაც უდიდესი სკანდალი იყო მოდის სამყაროში. მელანია ტრამპს არ იწვევდნენ მოდისა და კულტურის სფეროების უმნიშვნელოვანეს ღონისძიებებზე, აქილიკებდნენ შოუებში... მოკლედ, ტრამპის პრეზიდენტობის 4-მა წელმა მისი მეუღლისთვის სულაც არ ჩაიარა ისე "მშვიდად, გაწონასწორებულად და დიპლომატიურად", როგორც მისი ცისფერი კაბა წინასწარმეტყველებდა.

სამაგიეროდ, წელს მელანია ტრამპმა წინა ინაუგურაციისგან რადიკალურად განსხვავებული სტილი მოირგო. მოდა რომ მხოლოდ ლამაზად ჩაცმა არ არის და მელანია ტრამპის თითოეულ გადაწყვეტილებას პოლიტიკური ქვეტექსტი ახლავს, ალბათ, ყველა ვხვდებით. ამ ლუქით აღფრთოვანებული დავრჩი და მინდა აგიხსნათ, რატომ:

აშკარაა, რომ მელანია აღარ აპირებს პირველი ლედისთვის დაკისრებული მოვალეობების გულუბრყვილო ღიმილით შესრულებას, მაშინ, როცა საზოგადოების ნაღები ფენები მასთან თანამშრომლობაზე უარს აცხადებენ და თავიანთი წრიდან მის განდევნას ცდილობენ. პირიქით, მელანიას შემოსვა და სტუმრობა ცნობილი სახეებისთვის მალე პრივილეგიად იქცევა. ამაზე მიანიშნებს პირველ რიგში ის, რომ ასეთ საზეიმო დღეს მელანიამ მუქი ლურჯი ფერი მოირგო — იგივე საბაზისო ფერი, რაც 2017 წელს, თუმცა მისი 180 გრადუსით შეტრიალებული, ბევრად უფრო მკაცრი ტონალობა, რაც იმას ნიშნავს, რომ ტრამპის მეორე პრეზიდენტობისას მელანიასგან კვლავ ჩვეულ "კლასიკურ ელეგანტურობასა" და "სიმშვიდეს" არ უნდა ველოდოთ.

აღსანიშნავია ისიც, რომ პირველმა ლედიმ არც ისე ცნობილი დიზაინერის ტანსაცმელი მოირგო – Adam Lippes-ის კაბა და პალტო. ამით, ცალსახად ის განაცხადა, რომ აღარ აპირებს პრივილეგირებული დიზაინერების ჭკუაზე სიარულს და მათი ტანსაცმლით შემოსვის "დამსახურებას".

მელანიას ლუქის ცენტრალური ფიგურა მისი ქუდია. ეს ქუდი, რომელიც ყოფილი მოდელის დახვეწილ სახის მოყვანილობას გამოკვეთს და მის ჩაცმულობას საოცრად უხდება, ბევრად მეტია, ვიდრე სწორად შერჩეული აქსესუარი. ქუდი მას უმალავს ყველაზე მნიშვნელოვან და მეტყველ ნაკვთს — თვალებს, რითაც პირველი ლედი ენიგმატურ, მისტიკურ პერსონად გარდაიქმნა და მთელს სამყაროს განუცხადა, რომ მისი ქმედებები და დამოკიდებულებები აღარ იქნება მარტივად გასაშიფრი და ხელშესახები, როგორც ადრე.

ერთი სიტყვით, ვფიქრობ, რომ ინაუგურაციის დღის ჩაცმულობა მელანია ტრამპის "შურისძიების კაბაა". საინტერესოა, რას უნდა ველოდოთ მოდის სამყაროსგან აშშ-ს პირველ ლედისთან მიმართებით. ერთი რამ ცხადია — მელანია ტრამპი აღარავისი კეთილგანწყობისთვის არ აპირებს ბრძოლას.