დღეს 17:30 საათზე მედიის წარმომადგენლები პარლამენტთან შეიკრიბებიან და ბათუმელებისა და ნეტგაზეთის დამფუძნებლისა და დირექტორი, მზიას ამაღლობელის პოლიტიკურ დევნას გააპროტესტებენ.

ჟურნალისტები მოითხოვენ, რომ პროკურატურამ დაუყოვნებლივ შეწყვიტოს მისი საქმე, რომელიც უსამართლო ბრალდებას ეფუძნება და დაუყოვნებლივ გაათავისუფლოს მზია ამაღლობელი უკანონო პატიმრობიდან.

"უკვე მე-10 დღეა, რაც მზია ამაღლობელი უკანონო პატიმრობაშია. ის პროტესტის ნიშნად შიმშილობს. მას წაუყენეს ბრალდება, რომელიც დაშინებისა და პოლიტიკური რეპრესიის სახეს ატარებს, უკანონოდ შეუფარდეს წინასწარი პატიმრობა და დაარღვიეს სააპელაციო საჩივრის განხილვის ვადები. მზია ამაღლობელი ბათუმის პოლიციის განყოფილებაში არასათანადო მოპყრობის მსხვერპლი გახდა და მის მიმართ არაერთგზის დაირღვა უდანაშაულობის პრეზუმფცია", — ნათქვამია გავრცელებულ განცხადებაში.

დღეს მზია ამაღლობელის დაკავება და უკანონო პატიმრობა ბათუმში, სპეციალურ საგამოძიებო სამსახურის შენობასთან გააპროტესტეს ჟურნალისტებმა. აქციის მონაწილეები სპეციალურ საგამოძიებო სამსახურს მოუწოდებდნენ, რომ სწრაფად გამოიძიონ ბათუმის საქალაქო სამმართველოს უფროსის ირაკლი დგებუაძის მხრიდან, ბათუმელებისა და ნეტგაზეთის დამფუძნებლის, მზია ამაღლობელის მიმართ არაადამიანური მოპყრობის ფაქტი. მათი თქმით, ეს საქციელი იყო ძალადობრივი და ღირსების შემლახავი და უნდა დადგეს ირაკლი დგებუაძის სისხლის სამართლის პასუხისმგებლობა.