პანამის პრეზიდენტი ხოსე რაულ მულინო აშშ-ს პრეზიდენტის, დონალდ ტრამპის განცხადებას, სადაც ის პანამის არხის აშშ-სთვის დაბრუნებაზე საუბრობს, X-ზე გამოეხმაურა.

რაულ მულინო აცხადებს, რომ არხი იყო და რჩება პანამის შემადგენლობაში და მისი მენეჯმენტი დარჩება პანამის კონტროლის ქვეშ.

"პანამის რესპუბლიკისა და მისი ხალხის სახელით, კატეგორიულად უნდა უარვყო პრეზიდენტ დონალდ ტრამპის ინაუგურაციის დროს გაკეთებული განცხადებები პანამასთან და მის არხთან დაკავშირებით. ...არხი იყო და რჩება პანამის შემადგენლობაში და მისი მენეჯმენტი დარჩება პანამის კონტროლის ქვეშ, მისი მუდმივი ნეიტრალიტეტის მკაცრი დაცვით", — აცხადებს მულინო.

ცნობისათვის, 20 იანვარს, საპრეზიდენტო ფიცის დადების შემდეგ, ტრამპმა გამოაცხადა, რომ უახლოეს მომავალში პანამის არხი შეერთებული შტატების კონტროლის ქვეშ დაბრუნდება.

"პანამის არხს ჩინეთი აკონტროლებს და ჩვენ ის ჩინეთისთვის არ გადაგვიცია. ის პანამას გადავეცით და მას უკან ვიბრუნებთ," — თქვა აშშ-ს პრეზიდენტმა, დონალდ ტრამპმა კაპიტოლიუმში.

მულინომ ხაზგასმით აღნიშნა, რომ პანამა 25 წლის განმავლობაში ფლობს არხს და არც ერთი ქვეყანა არ ერევა მის მართვაში. ამავდროულად, პრეზიდენტის თქმით, პანამის ხელისუფლება მზად არის დიალოგისთვის, თუ ეს არ დაარღვევს პანამის უფლებებს, სუვერენიტეტს და მის საკუთრებას არხზე.

შეგახსენებთ, რომ 2024 წლის დეკემბრის ბოლოს ტრამპმა სთხოვა პანამის ხელისუფლებას, შეემცირებინათ ტარიფები არხის გამოყენებისთვის და იმუქრებოდა, რომ წინააღმდეგ შემთხვევაში შეერთებული შტატები არხის კონტროლის ქვეშ დაბრუნებას მოითხოვდა.