აშშ-ს სენატში სახელმწიფო მდივნის თანამდებობაზე დამტკიცებისთანავე მარკო რუბიომ კომენტარი გააკეთა რუსეთსა და უკრაინას შორის ომის დასრულებაზე. პოლიტიკოსი თვლის, რომ თითოეულ მხარეს რაღაცის დათმობა მოუწევს.

CNN-ის ინფორმაციით, მედიასთან საუბარში რუბიომ აღიარა, რომ რუსეთ-უკრაინის ომის დასრულების კონკრეტულ ვადებს ვერ ასახელებს.

თუმცა, მან განაცხადა, რომ კონფლიქტის დასასრულებლად ორივე მხარეს მოუწევს დათმობაზე წასვლა.

რუბიომ ასევე აშკარად აღიარა რუსეთი, როგორც აგრესორი ამ ომში.

"ჩვენ გვინდა, რომ ომი დასრულდეს. ეს საკმაოდ ნათელია. თქვენ ნახეთ, რომ პრეზიდენტმა ისაუბრა, რომ მას სურს იყოს პრეზიდენტი, რომელიც ხელს შეუწყობს მშვიდობას და დაასრულებს კონფლიქტებს," — თქვა აშშ-ს სახელმწიფო მდივანმა.

კითხვაზე, თუ როდის შეიძლება დაიწყოს მოლაპარაკებები და ცეცხლის შეწყვეტა, რუბიომ განაცხადა, რომ ეს იქნება პრეზიდენტის მთავარი პრიორიტეტი.

"შეიძლება იმედი გვქონდეს, რომ გარკვეული საფუძველი ჩაყრილია, მაგრამ ეს რთული იქნება. ვგულისხმობ იმას, რომ ეს რთული კონფლიქტია, სისხლიანი, და ის უნდა დასრულდეს", — თქვა რუბიომ.

მან დასძინა, რომ რუსეთი არის აგრესორი ამ კონფლიქტში, მაგრამ ეს ომი უნდა დასრულდეს.

20 იანვარს კაპიტოლიუმში აშშ-ს 47-ე პრეზიდენტმა სიტყვით გამოსვლისას პირდაპირ არ უხსენებია რუსეთ-უკრაინის ომი, მაგრამ ახსენა ომები, "რომლებსაც დაასრულებენ და ომები, რომლებშიც არასდროს შევლენ". ამასთან, ტრამპმა პირობა დადო, რომ მშვიდობისმყოფელი იქნება, როგორც პრეზიდენტი.

"ჩვენ შევაფასებთ ჩვენს წარმატებას არა მხოლოდ იმ ბრძოლებით, რომლებსაც მოვიგებთ, არამედ იმ ომებითაც, რომლებსაც დავასრულებთ და, ალბათ, რაც მთავარია, ომებით, რომლებშიც არასდროს შევალთ. ჩემი ყველაზე საამაყო მემკვიდრეობა იქნება, ვიყო მშვიდობისმყოფელი და გამაერთიანებელი. სწორედ ეს მინდა ვიყო, მშვიდობისმყოფელი და გამაერთიანებელი", — აღნიშნა აშშ-ის პრეზიდენტმა, დონალდ ტრამპმა.

დონალდ ტრამპმა არაერთხელ განაცხადა, რომ დაასრულებდა რუსეთ-უკრაინის ომს. კერძოდ, ტრამპმა პირობა დადო, რომ ომს მისი პრეზიდენტობის პირველი 24 საათის განმავლობაში დაასრულებდა. გარდა ამისა, 8 იანვარს ტრამპის მომავალმა სპეციალურმა წარმომადგენელმა უკრაინაში, კიტ კელოგმა განაცხადა, რომ მას სურდა გამოსავლის პოვნა რუსეთსა და უკრაინას შორის ომის დასასრულებლად 100 დღეში.

გუშინ ასევე გავრცელდა ინფორმაცია, რომ ტრამპის გუნდი ემზადება მოლაპარაკებებისა და რუსეთის პრეზიდენტ ვლადიმერ პუტინთან შეხვედრისთვის უკრაინის წინააღმდეგ ომის დასასრულებლად.