ქუთაისის სააპელაციო სასამართლომ წარმოებაში არ მიიღო საჩივარი ბათუმელებისა და ნეტგაზეთის დამფუძნებლის, მზია ამაღლობელისთვის წინასწარი პატიმრობის შეცვლის შესახებ.

მზია ამაღლობელს ბრალად პოლიციელზე თავდასხმა ედება და 4-დან 7 წლამდე პატიმრობა ემუქრება. ადვოკატის თქმით, ის პოლიციის განყოფილებაში არაადამიანური მოპყრობის მსხვერპლი გახდა — ამაღლობელს წინასწარი პატიმრობა აქვს მისჯილი და შიმშილობს.

შეგახსენებთ, რომ მზია ამაღლობელი პოლიციამ 11 იანვარს ორჯერ დააკავა. პირველად საპროტესტო შინაარსის პლაკატის გაკვრის გამო, მეორედ კი ბათუმის პოლიციის უფროს ირაკლი დგებუაძისთვის სილის გაწვნისთვის პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე. დაცვის მხარე მზად იყო, გირაოს სახით უზრუნველეყო 100 000 ლარის ღირებულების უძრავი ქონების მობილიზება.

20 იანვარს საიას თავმჯდომარემ, ნონა ქურდოვანიძემ განაცხადა, რომ თუ სააპელაციო სასამართლო მზია ამაღლობელს აღკვეთის ღონისძიების სახით გამოყენებულ პატიმრობას არ შეუცვლიდა, მაშინ ადვოკატები სტრასბურგის სასამართლოს მიმართავდნენ.