აშშ-ის მიერ სანქცირებული ბიძინა ივანიშვილის ცოლმა, ეკატერინა ხვედელიძემ საქართველოში ახალი კომპანია დააფუძნა. სააქციო საზოგადოება ლუსოლის 100%-იანი წილის მფლობელი ეკატერინა ხვედელიძეა. ახალი კომპანიის დაფუძნების შესახებ ინფორმაცია თავდაპირველად TV პირველმა გაავრცელა.

კომპანიის დირექტორი 37 წლის გელა კობერიძე იქნება. სწორედ მან მიმართა საჯარო რეესტრს კომპანიის რეგისტრაციისთვის. რადიო თავისუფლების ინფორმაციით, გამოცემა დაუკავშირდა ბიძინა ივანიშვილის ცოლის ახალი კომპანიის დირექტორს და ჰკითხა, რატომ დარეგისტრირდა ახალი კომპანია და რა იქნება მისი ფუნქცია. თუმცა მან კითხვებს არ უპასუხა და თქვა, რომ მოგვიანებით დაუკავშირდებოდა მათ.

სს "ლუსოლის" კაპიტალი საჯარო რეესტრის მონაცემებით, 100 000 ლარია. რადიო თავისუფლების ინფორმაციით, კომპანიის მმრთველი ორგანო სამეთვალყურეო საბჭოა, რომლის წევრებიც არიან: ნუგზარ დეკანოიძე, ვეფხვია დვალი და შოთა კობიაშვილი. ნუგზარ დეკანოიძე ამავდროულად არის "საფეხბურთო კლუბი საჩხერის ჩიხურას" დირექტორი, ბიძინა ივანიშვილის კომპანიის მეცხრე არხის დირექტორი.

სს "ლუსოლში" ეკატერინა ხვედელიძის წარმომადგენელია "ბანკი ქართუს" სამეთვალყურეო საბჭოს თავმჯდომარე, ნატო ხაინდრავა. ნატო ხაინდრავა ფიგურირებდა ბიძინა ივანიშვილის შვილის ახალ კომპანიაში, სააქციო საზოგადოება "ატუ ჰოლდინგშიც", რომელიც ქართული ოცნების საპატიო თავმჯდომარის ვაჟმა მამისთვის სანქციის დაწესებიდან ოთხ დღეში, 31 დეკემბერს დააფუძნა.