პარლამენტის კვლევითი ცენტრი უქმდება — ამ გადაწყვეტილების შესახებ ცენტრში დასაქმებულ საჯარო მოხელეებს სამუშაო შეხვედრაზე დღეს შეატყობინეს. მათი თქმით, რეორგანიზაციის შესახებ აქამდე გაფრთხილებაც კი არ მიუღიათ. სალომე ნატროშვილის, ნინი ლეჟავასა და მარიამ ჩაჩუას თქმით, მათ არაოფიციალურად განუცხადეს, რომ ყველაფერი რადიო თავისუფლებისათვის მიცემულ ინტერვიუს უკავშირდება. ასევე, დევნა, სავარაუდოდ დაკავშირებულია პეტიციასთან და ოფიციალურ განცხადებასთანაც, რომელიც კვლევითი ცენტრის თანამშრომლებმა გაავრცელეს ქართული ოცნების მიერ ევროინტეგრაციის პროცესის შეჩერებისა და მშვიდობიანი მომიტინგეების ძალადობრივი დარბევის შემდეგ.

ცენტრის სამმა მოქმედმა თანამშრომელმა, სალომე ნატროშვილმა, მარიამ ჩაჩუამ და ნინი ლეჟავამ, რადიო თავისუფლებისთვის მიცემულ ინტერვიუში, რომელიც 20 იანვარს გამოქვეყნდა, ღიად ილაპარაკეს საჯარო სექტორის თანამშრომლების პეტიციის გავრცელებისა და მასზე ხელმოწერის შემდგომ სამსახურში შექმნილ სირთულეებსა და მტრულ გარემოზე; საჯარო მოხელეების პროტესტზე; ღიად გააკრიტიკეს საჯარო სამსახურის შესახებ კანონში შეტანილი ცვლილებები.

სალომე ნატროშვილმა, ნინი ლეჟავამ და მარიამ ჩაჩუამ განაცხადეს, რომ ხელმძღვანელობა ცდილობს, მათგან მტრის ხატი შექმნას და ცენტრის დანარჩენი თანამშრომლების თვალში (გათავისუფლება 20-მდე თანამშრომელს ემუქრება) ისინი ცენტრის ლიკვიდაციის მიზეზად წარმოაჩინოს.

2024 წლის ბოლოდან, სხვადასხვა მიზეზით, საჯარო სამსახურიდან არაერთი მოხელე გაათავისუფლეს. მათი ნაწილი სასამართლოში ბრძოლას აპირებს და აცხადებს, რომ მათი გათავისუფლების რეალური მიზეზი ღია პროტესტის, დეკემბრის აქციების ძალადობრივი დაშლის გაპროტესტება და საპროტესტო პეტიციებზე ხელმოწერა გახდა.