ჯანდაცვის მსოფლიო ორგანიზაცია ამერიკის შეერთებული შტატების ორგანიზაციიდან გასვლასთან დაკავშირებით მიღებული გადაწყვეტილების გამო შეწუხებულია და აშშ-ს პარტნიორობის შესანარჩუნებლად კონსტრუქციულ დიალოგს სთავაზობს. ამის შესახებ ჯანმოს ოფიციალურ საიტზე გამოქვეყნებულ განცხადებაში წერია.

განცხადებაში ნათქვამია, რომ ჯანმო გადამწყვეტ როლს თამაშობს მსოფლიოს ხალხის, მათ შორის, ამერიკელების ჯანმრთელობისა და უსაფრთხოების დაცვაში. ორგანიზაცია წერს, რომ დაავადების ძირეული მიზეზების აღმოფხვრით, ჯანდაცვის ძლიერი სისტემების შექმნით და ჯანმრთელობის გადაუდებელი შემთხვევების გამოვლენით, ასევე პრევენციითა და რეაგირებით, ის ინარჩუნებს წამყვან პოზიციებს.

"შეერთებული შტატები იყო ჯანმო-ს დამფუძნებელი წევრი 1948 წელს და მას შემდეგ მონაწილეობდა ჯანმო-ს მუშაობის ფორმირებასა და მართვაში, 193 სხვა წევრ სახელმწიფოსთან ერთად. შვიდი ათწლეულის მანძილზე ჯანმო-მ და აშშ-მა გადაარჩინეს უამრავი სიცოცხლე და იცავდნენ ამერიკელებს და ყველა ადამიანს ჯანმრთელობის საფრთხისგან. ჩვენ ერთად დავასრულეთ ჩუტყვავილა და ერთად მივიყვანეთ პოლიომიელიტის აღმოფხვრის ზღვარზე. ამერიკულმა ინსტიტუტებმა წვლილი შეიტანეს და ისარგებლეს ჯანმო-ს წევრობით.", — წერია განცხადებაში." —წერია ჯანდაცვის მსოფლიო ორგანიზაციის განცხადებაში.

ჯანმო იმედს იტოვებს, რომ შეერთებული შტატები გადახედავს თავის გადაწყვეტილებას.

"ჩვენ მოუთმენლად ველით, რომ აშშ-სა და ჯანდაცვის მსოფლიო ორგანიზაციას შორის პარტნიორობის შესანარჩუნებლად კონსტრუქციული დიალოგი შედგება, რათა მომავალში მთელ მსოფლიოში მილიონობით ადამიანის ჯანმრთელობას და კეთილდღეობას საფრთხე არ დაემუქროს" — აღნიშნულია განცხადებაში.

აშშ-ის 47-ე პრეზიდენტმა, დონალდ ტრამპმა 20 იანვარს ხელი მოაწერა განკარგულებას ჯანმრთელობის მსოფლიო ორგანიზაციიდან (WHO) შეერთებული შტატების გასვლის შესახებ.