ევრონიუსის ცნობით, უნგრეთის პრემიერმინისტრი ვიქტორ ორბანი 20 იანვარს დონალდ ტრამპის ინაუგურაციას არ დაესწრება — ინფორმაციას მისი პრესმდივანი ადასტურებს.

ტრამპის დიდი ხნის მოკავშირე სხვა მემარჯვენე ლიდერებთან, მათ შორის ხავიერ მილეისთან და ჯორჯა მელონისთან ერთად ღონისძიებაზე მიწვეული იყო, თუმცა, მიუხედავად ამისა, ორბანი აშშ-ში არ გაემგზავრება — ის, ამის ნაცვლად, ბუდაპეშტში პრეზენტაციას გამართავს, რომელშიც ისაუბრებს ქვეყნის ევროკავშირის პრეზიდენტობის დროინდელ პერიოდზე.

ავტოკრატიისადმი მიდრეკილებების გამო ევროპელი ლიდერების მხრიდან არაერთხელ გაკრიტიკებული ორბანი დიდი ხანია დონალდ ტრამპის მხარდამჭერია — ორი პოლიტიკოსი მოკავშირეები ჯერ კიდევ 2016 წელს, ტრამპის პირველი საპრეზიდენტო ვადისწინა საარჩევნო კამპანიისას გახდნენ.

აშშ-ის არჩეულმა პრეზიდენტმა უნგრეთის პრემიერს ჯერ 2019 წელს თეთრ სახლშიც უმასპინძლა. ორბანი ტრამპს გასულ წელს, ფლორიდაშიც შეხვდა და განაცხადა, რომ არჩევის შემთხვევაში, ის რუსეთ-უკრაინის ომს დაასრულებდა.

ტრამპმა ინაუგურაციაზე ორბანისა და სხვების მიწვევით, დაარღვია ათწლეულების ტრადიცია, რომლის მიხედვითაც, როგორც წესი, აშშ-ის პრეზიდენტის ინაუგურაციას სხვა ქვეყნის ლიდერები არ ესწრებიან.